Jetisýda qutqarý qyzmetin jańǵyrtý jalǵasyp jatyr
ASTANA.KAZINFORM — Jetisý oblysyna jumys saparymen kelgen Qazaqstan Respýblıkasy Tótenshe jaǵdaılar mınıstri, general-leıtenant Shyńǵys Árinov jáne oblys ákimi Beıbit Isabaev qutqarýshylarǵa arnaıy tehnıka kiltterin tapsyrdy.
Taldyqorǵandaǵy ortalyq alańda ótken kilt berý saltanatynda sóz sóılegen óńir basshysy oblysta tótenshe jaǵdaılar salasynyń materıaldyq bazasyn nyǵaıtýǵa júıeli túrde kóńil bólinetinin aıtty.
— 2022-2025 jyldarda 42 dana tehnıka satyp alynsa, sonyń 18-ine qarajat jergilikti bıýdjet esebinen bólindi. Sonymen qatar bıyl jergilikti bıýdjetten qarjy lızıngi arqyly órt sóndirý, qutqarý bólimsheleriniń qajettilikteri úshin 14 birlik tehnıka satyp alý josparda bar. Budan bólek, ınfraqurylymdy jaqsartý úshin jańa órt sóndirý depolaryn salý, qoldanystaǵy ǵımarattardy jóndeý jumystary júrgizilip jatyr, — degen Beıbit Isabaev tótenshe jaǵdaılar departamentiniń materıaldyq-tehnıkalyq bazasyn kezeń-kezeńimen jańǵyrtý aldaǵy ýaqytta da jalǵasatynyn jetkizdi.
— Memleket basshysynyń qoldaýymen elimizdiń barlyq óńirinde materıaldyq-tehnıkalyq baza kúsheıip keledi. Ásirese, tabıǵaty kórkem, tórt mezgili minezdi bul aımaqta qutqarý qyzmeti árdaıym saqadaı saı bolýy tıis. Tótenshe jaǵdaı ornyna jyldam jetip, shuǵyl kómek kórsetý úshin tehnıka zaman talabyna saı bolýy shart. Azamattyq qorǵaý júıesine kórsetip otyrǵan qoldaýy úshin oblys basshylyǵyna rızashylyǵymdy bildiremin, — dedi Tótenshe jaǵdaılar mınıstri Shyńǵys Árinov.
Jańa kólikterge ıe bolǵandardyń biri Jarkent qalasynaǵy № 11 órt sóndirý bóliminiń bastyǵy, azamattyq qorǵaý aǵa maıory Janat Núsipov óz pikirin bildirdi.
— Búgin bizdiń bólimge 2 arnaıy avtokólik berildi. Bul biz úshin — úlken qoldaý. Tótenshe jaǵdaıda jedel áreket etýge jáne aldyn alýǵa zor septigin tıgizedi. Jarkenttik qutqarýshylar kómek kórsetýge, halyqtyń qaýipsizdigin qamtamasyz etýge árqashan daıyn, — dedi ol.
Budan ári qaraı shara arnaıy kólik kiltterin tapsyrý rásimimen jalǵasty. Taldyqorǵan qalasyndaǵy, Panfılov, Alakól, Sarqan aýdandaryndaǵy órt sóndirý bólimderine jáne oblystyq TJD-ǵa órt sóndirý avtotehnıkasy, jol talǵamaıtyn jedel-qutqarý kólikteri, qutqarý katerleri t. b. qajetti tehnıkalar tapsyryldy.
Aıta ketelik elde aýyl sharýashylyǵy tehnıkasyn jańartý qarqyny qalaı ekenin jazǵan edik.