Jetisýda Kórisý kúni – Amal merekesi toılandy
TALDYQORǴAN. KAZINFORM – Búgin Jetisý oblysy Naýryz meıramynyń bastamasy bolǵan Kórisý kúni – Amal merekesin aq tilekpen, dástúrli kórisýmen qarsy aldy. Saltanatty is-sharalar oblystyń barly aýdan-qalalarynda ótti. Sonyń ishinde Taldyqorǵan qalasynyń ortalyq alańynda «Bir kórisý – bir jyldyq qýanysh» atty merekelik is-shara uıymdastyryldy, dep habarlaıdy Jetisý oblysy ákiminiń baspasóz qyzmeti.
Osy kúni ortalyq alańda Bıken Rımova atyndaǵy akademııalyq drama teatrynyń ártisteri men D.Raqyshev atyndaǵy oblystyq fılarmonııa ánshileri teatrlandyrylǵan kórinis usynyp, kórisý dástúri sahnalandy.
Sondaı-aq túrli etnos ókilderi ózara qazaqtyń «kórisý» dástúrimen qushaq aıqastyryp, bir-birine aq tilegin aıtty. Bul kúnniń barshaǵa ortaq mereke ekenin pash etti. Sol sııaqty etno-mádenı birlestikter músheleri ózderiniń ulttyq bılerin kópshilik nazaryna usyndy.
Budan ári is-shara merekelik kontsertpen jalǵasyp, merekege arnalǵan óleńder oqyldy, halyq ánderi shyrqaldy. Іs-shara qarııanyń oblys halqyna arnaǵan aq bata berýimen túıindeldi.
Atap ótsek, oblys ákiminiń áleýmettik jelidegi jarııalanǵan quttyqtaýynda «Kórisý kúni – Amal merekesiniń» jas urpaqty tárbıeleýdegi jáne mádenı mura men ulttyq erekshelikti saqtaýdaǵy róli atalyp ótti.
- Aq tilek aıtyp, jaqyn jandarmen júzdesý dostyq pen syılastyqty nyǵaıtyp, qoǵamnyń tutastyǵy men turaqtylyǵyn bekemdeı túsedi. Osy jarqyn merekede ár shańyraqqa yrys pen baq uıalasyn. Barshańyzǵa myqty densaýlyq, tolaıym tabys, beıbit te berekeli ǵumyr tileımin! – delingen quttyqtaýda.
Osy kúni alańǵa kelgen turǵyndardyń biri Álııa Baljan pikir bildirdi.
- Búgin ortalyq alańǵa Kórisý kúnine arnalǵan merekelik is-sharany tamashalaýǵa arnaıy keldim. Mereke kóterińki kóńil kúıde ótti, Naýryzdyń bastalǵanyn sezindik. Bul kúni adamdar qysty aman-esen ótkerip, kóktemge jetkenine qýanyp, biri-birimen qol alysady, qushaqtasady, ókpe-renishterin umytyp, Naýryzdy jańa úmitpen, jyly shyraımen, jaqsylyqpen qarsy alady, - dedi ol.
Atap ótsek, bul kúni oblystyń barlyq aımaǵynda Amal kúniniń mánin ashatyn dóńgelek ústelder, kontsertter, teatrlandyrylǵan kórinister jáne basqa da mádenı-kópshilik sharalar ótip jatyr.
