Jetisýda kórneki aqparattyń tildik sapasyna qoıylatyn talap kúsheıtiledi

TALDYQORǴAN. KAZINFORM — Jetisý oblysynda kásipkerlik nysandardaǵy kórneki aqparat pen jarnama mátinderiniń memlekettik tilde saýatty jazylýyn qamtamasyz etý maqsatynda monıtorıng jumystary bastaldy. Bul týraly B. Quranbek atyndaǵy Jýrnalıster úıinde ótken baspasóz máslıhatynda oblystyq Qoǵamdyq damý basqarmasynyń bólim basshysy Ermek Aqshabaev málimdedi.

— Anyqtalǵan zańbuzýshylyqtar boıynsha kásip ıelerine eskertýler berilip, túsindirý jumystary júrgizildi. Kórneki aqparattyń mazmuny men mátini Qazaqstan Respýblıkasyndaǵy Til týraly zań talaptaryna saı bolýy tıis, — dedi Ermek Aqshabaev.

Onyń aıtýynsha, búginge deıin Taldyqorǵan qalasy boıynsha 220-dan astam kásipkerlik nysan tekserilip, 113 quqyqbuzýshylyq tirkelgen. Jıi kezdesetin qatelikterdiń qatarynda memlekettik tildegi aýdarmalardyń maǵynasy burmalanýy, orfografııalyq jáne grammatıkalyq qatelerdiń bolýy atap ótildi.

Basqarma mamandarynyń habarlaýynsha, mundaı tekserister aldaǵy ýaqytta da jalǵasyn tabady. Monıtorıngtik toptyń quramynda oblystyq Qoǵamdyq damý basqarmasynan bólek, halyqaralyq «Qazaq tili» qoǵamynyń Jetisý oblystyq fılıalynyń ókilderi de bar.

— Qoǵamdyq oryndarda nemese kásipkerlik nysandardaǵy kórneki aqparatta ketken tildik qateler týraly kez kelgen azamat «E-otinish» platformasy arqyly tıisti organdarǵa habarlaı alady, — dep atap ótti basqarma ókili.

Sondaı-aq jarnama agenttikterimen birlesken jumystar jandanyp, ózara yntymaqtastyq týraly memorandýmdarǵa qol qoıylýda. Memlekettik tildegi mátinderdiń sapasyn arttyrý maqsatynda arnaıy jadynamalar daıyndalyp, BAQ jáne áleýmettik jeliler arqyly keńinen taratylady.

Aıta keteıik, qazaq tilindegi balalar ádebıeti tsıfrlyq formatqa kóshiriletinin jazǵanbyz.