Jetisýda kópbalaly ana kúıeýin óltirdi degen kúdikke ilindi
ASTANA. KAZINFORM – Jetisý oblysynda 45 jastaǵy er adamnyń qazasyna qatysty tergeý júrgizilip jatyr. Kisi óltirdi degen kúdikpen marqumnyń jubaıy ustaldy, dep habarlaıdy Kazinform agenttiginiń óńirdegi tilshisi.
Óńirlik polıtsııa departamentiniń málimetinshe, qaıǵyly oqıǵa 10 maýsymǵa qaraǵan túni Tekeli qalasyndaǵy jekemenshik úılerdiń birinde bolǵan.
– Atalǵan fakti boıynsha qylmystyq is qozǵaldy. Tergeý barysynda ólimge ákelgen jaraqatty erli-zaıyptylardyń birge spırttik ishimdik ishken kezinde jubaıynyń salǵany anyqtaldy. Oqıǵanyń barlyq mán-jaıyn obektıvti túrde anyqtaýǵa baǵyttalǵan qajetti tergeý áreketteri júrgizilýde. Sotqa deıingi tergep-tekserý barysy baqylaýda jáne prokýratýra organdarymen kelisim boıynsha júzege asyrylyp jatyr, – dep habarlady Jetisý oblystyq polıtsııa departamentiniń baspasóz qyzmeti.
Polıtsııanyń málimetinshe, sot sanktsııasymen kúdiktige qatysty qamaýda ustaý túrindegi bultartpaý sharasy tańdalǵan. Qazir áıel Taldyqorǵandaǵy tergeý ızolıatorynda otyr.
Oqıǵadan keıin áleýmettik jelilerde ustalǵan áıeldi qoldaýǵa baǵyttalǵan jazbalar men úndeýler taraı bastady. Olardyń avtorlary áıeldiń kópbalaly ana ekenin jáne uzaq jyldar boıy kúıeýinen turmystyq zorlyq-zombylyq kórgenin alǵa tartyp otyr.
Atap aıtqanda, jarııalanǵan úndeýlerdiń birinde otbasynyń kórshileri erli-zaıyptylar arasyndaǵy janjaldarǵa birneshe ret kýá bolǵandaryn aıtqan. Olardyń sózinshe, er adam alkogoldi shamadan tys tutynǵan, jıi janjal shyǵaryp, otbasy múshelerine agressııa kórsetken.
Alaıda bul aqparat quqyq qorǵaý organdary tarapynan ázirge resmı túrde rastalǵan joq. Oqıǵanyń mán-jaıy sotqa deıingi tergep-tekserý aıasynda anyqtalyp jatyr.
Polıtsııa departamenti barlyq qajetti tergeý sharalary aıaqtalǵannan keıin ǵana túpkilikti protsessýaldyq sheshim qabyldanatynyn atap ótti.
Qazaqstan Respýblıkasy Qylmystyq-protsestik kodeksiniń 201-babyna sáıkes, tergeý múddesine baılanysty ózge aqparat jarııa etýge jatpaıdy.
Buǵan deıin Almaty oblysynda polıtsııa qyzmetkeri áıelin kólikpen qaǵyp óltirgenin habarladyq.
