Jetisýda kómir qorynyń 22 paıyzy daıyn

TALDYQORǴAN. KAZINFORM — Óńirde 2025-2026 jylǵy jylytý maýsymyna daıyndyq jalǵasyp jatyr.

Oblysqa qajetti 397 myń tonna kómirdiń búgingi kúni 88,8 myń tonnasy daıyndalǵan. Bul jalpy qajettiliktiń 22 paıyzyn quraıdy.

Oblystyq Energetıka jáne turǵyn úı-kommýnaldyq sharýashylyq basqarmasynyń basshysy Aıdos Beketaevtyń aıtýynsha, daıyndalǵan kómirdiń 68,3 myń tonnasy halyqqa satylǵan. Al qalǵan 20,5 myń tonnasy óńirdegi kómir qoımalary men taratý alańdarynda saqtaýly tur.

— Qazirgi tańda oblys boıynsha kómir saqtaý jáne taratý boıynsha 43 nysan jumys istep tur. Onyń 35-i — kómir taratý alańy, 8-i — arnaıy qoıma, — dedi Aıdos Beketaev.

Kómir jetkizý jumystary kúndelikti baqylaýda. «QTJ — Júk tasymaly» UK» AQ tarapynan vagondar qozǵalysyna turaqty monıtorıng júrgizilip jatyr.

Aıdos Beketaevtyń málimdeýinshe, oblysqa táýligine orta eseppen 14 vagon, ıaǵnı shamamen 966 tonna kómir jetkiziledi. Onyń ishinde «Shubarkól» jáne «Qarajyra» ken oryndarynan kún saıyn 7 vagonnan kómir jóneltilip otyr.

Temir jol qatynasy joq aýdandar úshin kómir avtokólikpen tasymaldanady. Bul baǵyttaǵy jumystar da jergilikti atqarýshy organdardyń baqylaýynda.

— Otyn tapshylyǵyna jol bermeý úshin turǵyndarǵa kómirdi aldyn ala satyp alýǵa keńes beremiz. Kómir satýmen aınalysatyn kásiporyndar men tasymaldaýshylarǵa túsindirý jumystary júrgizilip jatyr, — dedi basqarma basshysy.

Buǵan deıin, Jetisýda 85 paıyzǵa tozǵan negizgi qazandyq gazǵa kóshiriletinin jazǵanbyz.