Jetisýda qyzylsha ótkizý úshin kóliginde túnegen fermerlerge ystyq tamaq uıymdastyryldy
TALDYQORǴAN. KAZINFORM — Jetisý oblysynda sebilgen 13,7 myń gektar qant qyzylshasynyń búgingi kúni 11,5 myń gektary, nemese 83,7% qazylyp, 545 myń tonna ónim alyndy. Qalǵan 2,2 myń ga alqapta jıyn-terin jalǵasyp jatyr. Qyzylsha qazýǵa 80 kombaın jumyldyrylǵan.
Oblystyq aýyl sharýashylyǵy basqarmasynyń 18 qarashadaǵy málimetine qaraǵanda, qant zaýyttaryna 445 myń tonna ónim ótkizilgen.
Sonyń 212 myń tonnasy — Kóksý qant zaýytyna, 233 myń tonnasy — Aqsý zaýytyna, odan bólek Aqsýǵa 29 myń tonna tátti túbir Jambyl oblysynan jetkizilgen.
— Qant qyzylshasyna beriletin sýbsıdııa kólemi ulǵaıtylǵan soń bul daqyldy ósirýdiń tabystylyǵy da ósip, sharýalardyń qyzyǵýshylyǵy artty, sóıtip bıylǵa josparlanǵan 10,7 myń gektardyń ornyna 13,7 myń gektarǵa, ıaǵnı 3,0 myń gektarǵa artyq sebildi. Sharýalardyń ósirgen ónimin der kezinde qazyp alyp, zaýyttarǵa ótkizýi asa mańyzdy. Sondyqtan ónimdi jınaý jáne qabyldaý 15 qyrkúıekten bastaldy. Qazir eki zaýyt bekitilgen kestege sáıkes kúndelikti jalpy 5 myń tonna qant qyzylshasyn qabyldap otyr, — deıdi oblystyq aýyl sharýashylyǵy basqarmasynyń basshysy Nurdáýlet Kenenbaev.
Qyzylsha ótkizýge kezekte turǵan kólik júrgizýshilerine qolaıly jaǵdaı jasaý úshin olarǵa ystyq tamaq uıymdastyrylǵan. Bul iske Kóksý, Aqsý aýdandarymen qatar qyzylsha ósirýshi barlyq aýdan-qalalardyń jergilikti atqarýshy organdary da atsalysyp jatyr.
Bıyl oblysta egin sharýashylyǵy baǵytyna jalpy 14 mlrd. teńge bólindi, sonyń 9,7 mlrd teńgesi basym daqyldardy sýbsıdııalaýǵa, 2,6 mlrd. teńgesi mıneraldy tyńaıtqyshtardy, 1,2 mlrd teńgege jýyǵy tuqymdy, 483 mln teńgege jýyǵy pestıtsıdti sýbsıdııalaýǵa qarastyryldy.
Sol sııaqty kóktemgi dala jáne ónimdi jınaý jumystaryna 11 myń tonna arzandatylǵan dızel otyny bólindi.
Sonymen qatar, oblystyq bıýdjet esebinen qant qyzylshasy baǵytynda 5 aýdanda jańa 8 servıstik-daıyndaý ortalyǵyn qurýǵa 2,5 mlrd teńge bólinip, 62 tehnıka sharýashylyqtarǵa lızıngke berildi, sonyń 28-i sepkish, 15-i — japyraq jınaǵysh mashına, 19-y — kombaın.
Búgingi kúnge qant zaýyttary sharýashylyqtarǵa qabyldaǵan qyzylshaǵa 3,3 mlrd teńge tóledi, onyń ishinde Kóksý qant zaýyty — 1,4 mlrd teńge, Aqsý qant zaýyty — 1,9 mlrd teńge.
Sonymen qatar, aýyl sharýashylyǵy basqarmasy tarapynan sharýashylyqtardan túsken 160 ótinim boıynsha 3,1 mlrd teńge sýbsıdııa tólendi.
Eske salaıyq buǵan deıin Jetisý oblysynda Kóksý qant zaýytyna qyzylsha ótkizetin sharýalar 2-3 táýliktep kólikterine qonyp, kezek kútip jatqanyn jazǵanbyz.
