Jetisýda qaıtarylǵan aktıvter qarajatyna 29 nysan salynyp jatyr
ASTANA. KAZINFORM - Jetisý oblysynyń Rýdnıchnyı aýylynda jańa mekteptiń saltanatty ashylý rásimi ótti. Sharaǵa Jetisý oblysynyń ákimi Beıbit Isabaevpen birge oblys prokýrory Baýyrjan Jumaqanov katysty.
Jańa bilim berý orny Prezıdentimiz Qasym-Jomart Kemelulynyń tapsyrmasy negizindegi memleketke zańsyz shyǵarylǵan aktıvterdiń qaıtarylǵan qarajat esebinen salyndy.
Mektep qurylysynyń tarıhy 2025 jyly Bas prokýror Berik Asylov pen Jetisý oblysynyń ákimi Beıbit Isabaev bolashaq mekteptiń irgetasyna estelik kapsýla salý rásiminen bastaldy.
Jobanyń qurylysy prokýratýranyń baqylaýynda boldy.
Jańa mektep salý qajettiligi 1970 jyldary salynǵan qoldanystaǵy ǵımarattyń jaǵdaıyna jáne onyń qazirgi zamanǵy bilim berý úderisine qoıylatyn talaptarǵa sáıkes kelmeýine baılanysty týyndady.
Mekteptiń ashylýy aktıvterdi memleketke qaıtarý jáne olardy áleýmettik mańyzy bar maqsattarǵa baǵyttaý jónindegi jumystyń naqty nátıjesin kórsetti. Ótken jyly salynǵan estelik kapsýla búgin zamanaýı bilim berý nysanyna aınalǵan jobanyń bastalýyn aıǵaqtaıtyn negizine aınaldy.
Jetisý oblysynda memleketke qaıtarylǵan qarajat esebinen jalpy quny 41,9 mlrd teńge bolatyn 29 áleýmettik jáne kommýnaldyq mekemeler salynyp, qaıta jańǵyrtylyp jatyr.
Olardyń qatarynda 21 densaýlyq saqtaý, 4 sýmen jabdyqtaý jáne 4 bilim berý nysandary bar. Búginde, olardyń 23-niń qurylysy aıaqtaldy, taǵy 6-y boıynsha jumys jalǵasyp jatyr.
Atalǵan jobalardy iske asyrý áleýmettik ınfraqurylymdy damytýǵa jáne oblys turǵyndarynyń ómir súrý sapasyn arttyrýǵa yqpal etedi.
Aıta ketelik Ulytaýda qaıtarylǵan aktıvter qarjysyna jańa mektep salynǵan edi.
