Jetisýda ıtti kólikke baılap súıregen júrgizýshi jazalandy
ASTANA. KAZINFORM – Jetisý oblysynda ıtti kólikke baılap súıregen júrgizýshi ákimshilik jaýapkershilikke tartyldy.
Áleýmettik jelilerde aq tústi avtokóliktiń jol boıymen ıtti baılap alyp júrgen vıdeosy taraǵan. Kadrlar jeli qoldanýshylarynyń ashýyn týǵyzdy.
Polıtsııa qyzmetkerleri jarııalanymǵa jedel áreket etip, izdestirý sharalary barysynda júrgizýshiniń jeke basyn anyqtady.
– Ol janýarǵa qatygezdik kórsetkeni úshin QR Ákimshilik quqyq buzýshylyq týraly kodeksiniń 407-1-baby boıynsha jaýapkershilikke tartylyp, aıyppul salyndy, – dep habarlady quqyq qorǵaý organdary.
It tabylyp, veterınarlyq qyzmetke tekserý jáne qajetti kómek kórsetý úshin tapsyrylǵan.
Polıtsııa janýarlarǵa qatygezdik kórsetýge jol berilmeıtinin jáne mundaı áreketter zań aıasynda jaýapkershilikke ákeletinin eske saldy.
Aıta keteıik, buǵan deıin Memleket basshysy Qasym-Jomart Toqaev janýarlarǵa jaýapkershilikpen qaraý týraly zańǵa qol qoıǵan bolatyn.
