Jetisýda ınvestorlar onkologııalyq ortalyq salady
TALDYQORǴAN. KAZINFORM – Taldyqorǵanda ınvestorlar óz qarajatyna zamanaýı onkologııalyq ortalyq salady. Osyǵan oraı oblys ákimi Beıbit Isabaev, Densaýlyq saqtaý mınıstrligi, «Kazakhmys Holding» ınvestor-kompanııasy úsh jaqty memorandýmǵa qol qoıdy. Bul týraly oblys ákiminiń baspasóz qyzmeti habarlady.
Óz sózinde Beıbit Isabaev óńirde jańa onkologııalyq ortalyq salý týraly tapsyrmany Prezıdent Jetisý oblysyna kelgen jumys sapary barysynda bergenin atap ótti.
«Túrli nusqalar boldy. Aldymen biz salynyp jatqan ǵımarattyń qoldanylý maqsatyn ózgertýdi josparladyq, onda oblys bólingenge deıin sot ǵımaraty bolady dep josparlanǵan. Biraq obektıvti sebepterge baılanysty bul josparǵa sáıkes kelmedi. Endi ol jerde 500 oryndyq emhana bolady, bul jańadan keńeıip kele jatqan shaǵyn aýdan úshin óte qajet. Biz Kerbulaq aýdanynda mys óndiretin taý-ken baıytý kombınatyn salýmen aınalysyp jatqan «Kazakhmys Holding» kompanııasynyń basshylyǵymen jarty jyl kóleminde kelissózder júrgizdik. Bul – quny 1 trln teńge shamasyndaǵy úlken ınvestıtsııalyq joba. Edýard Vıktorovıch kompanııa qarajaty esebinen onkologııalyq ortalyq salý jónindegi usynysymyzdy qoldady. Búgin biz arnaıy memorandýmǵa qol qoıý arqyly ýaǵdalastyǵymyzdy resmı túrde bekitemiz. Jalpy onkologııalyq aýrýlar júrek-qan tamyry aýrýlarynan keıingi 2 orynda tur. Bul bizdiń aımaqtyń nemese eldiń ǵana emes, búkil álem kólemindegi ózekti máselege aınalyp otyr. Sondyqtan qazirgi zamanǵy onkologııalyq ortalyqtyń qurylysy onkologııalyq aýrýlarmen kúresýdiń júıeli sharasy retinde asa qajet dep bilemiz», - degen oblys ákimi ınvestor-kompanııanyń basshylyǵyna sóz berdi.
«Kazakhmys Holding» JShS dırektorlar keńesiniń tóraǵasy Edýard Ogaıdyń aıtýynsha, 1993 jyldan beri jumys istep kele jatqan kompanııa áleýmettik máselelerge baǵdarlanǵan.
«Buǵan deıin Qazaqstan boıynsha birneshe áleýmettik mańyzdy jobalardy iske asyrdyq. Sý tasqyny men onyń saldarymen kúres kezinde de syrt qalǵan joqpyz. Josparlanyp otyrǵan ken baıytý kombınatynyń qurylysy metallýrgııanyń damýyna, jańa jumys oryndarynyń ashylýyna yqpal etetin bolady. Áleýmettik jaýapkershiligimizdi túsine otyryp, biz onkologııalyq ortalyq salý jónindegi usynysty qoldadyq. Kombınat salýmen qatar osy mańyzdy medıtsınalyq mekemeniń qurylysymen de qatar aınalysamyz», - dedi ol.
Beıbit Isabaev atap ótkendeı, bıýdjet qarajatyn tıimdi paıdalaný maqsatynda Jambyl oblysyndaǵy 200 oryndyq onkologııalyq ortalyq qurylysynyń jobasy negizge alynyp otyr. Bul rette eń mańyzdysy – ortalyqty zamanaýı materıaldyq-tehnıkalyq bazamen qamtamasyz etý. Bul máselede Densaýlyq saqtaý mınıstrligi járdemdesedi.
Birinshi vıtse-mınıstr Tımýr Sultanǵazıevtiń aıtýynsha, qazir onkologııalyq syrtqattar boıynsha kórsetiletin qyzmetti damytýǵa basymdyq berilip otyr.
«Onkologııalyq aýrýlardyń jyl saıynǵy ortasha ósimi 5%-dy quraıdy. Bul rette ólim-jitim 2-3%-ǵa tómendedi. Osyndaı aýrýmen aýyratyn naýqastardyń 5 jylǵa deıin ómir súrýin 60%-ǵa deıin jetkizýdi kózdep otyrmyz. Ol úshin el Prezıdentiniń tapsyrmasy boıynsha 2023-2027 jyldarǵa arnalǵan onkologııalyq aýrýlarmen kúres jónindegi keshendi jospar bekitildi, onyń sheńberinde Jetisý oblysy úshin arnaıy joǵary tehnologııaly, medıtsınalyq aýyr jabdyqtar satyp alý kózdelgen. Ákimdik pen demeýshiniń onkologııalyq qyzmetti damytýǵa basa nazar aýdarǵany bizdi qýantyp otyr», - dedi T.Sultanǵazıev.
Munan soń Qazaq onkologııa jáne radıologııa ǵylymı-zertteý ınstıtýtynyń dırektory Dılıara Qaıdarova Taldyqorǵanda jumys istep turǵan onkologııalyq ortalyqtyń moraldyq, ári fızıkalyq turǵydan eskirgenin, al zamanaýı jabdyqtarmen jasaqtalǵan jańa ortalyqtyń qurylysy ınstıtýt úshin erte dıagnostıkanyń sapasyn arttyrýǵa kómektesetinin jáne ınnovatsııalyq ońdy em uıymdastyrýǵa yqpal etetinin atap ótti.
Oblys basshysy kadr máselesi erekshe ózekti ekenin tilge tıek etti. Jetisýda zamanaýı onkologııalyq ortalyqty salý týraly sheshim qabyldanǵanǵa deıin bekitilgen Keshendi jospardaǵy belgilengen jabdyqtar endigi jerde jetkiliksiz bolatynyn, qosymsha qajettilik taǵy da artatynyn aıtty. Densaýlyq saqtaý mınıstrligi men mamandandyrylǵan ınstıtýttyń ókilderi osy eki máseleni sheshýde qajetti qoldaý kórsetiletinine sendirdi. Kezdesý sońynda úsh jaqty memorandýmǵa qol qoıyldy. Beıbit Isabaev jıyndy qorytyndylaı kele, áleýmettik mańyzy bar istegi alǵashqy qadam júzege asyrylǵanyn, budan ári ınvestor kompanııa ókilderi men oblystyq qurylys basqarmasy arasynda kelisimge qol qoıylatynyn atap ótti.
