Jetisýda ınvestordyń artyq tólegen 14,6 mln teńgesi qaıtaryldy
ASTANA. KAZINFORM — Jetisý oblysynyń prokýratýrasy Investorlardyń quqyqtaryn qorǵaý komıtetiniń úılestirýimen ınvestordyń quqyǵyn qorǵap, kásiporynǵa artyq tólengen qosylǵan qun salyǵynyń (QQS) 14,6 mln teńgeden astam somasyn qaıtarýǵa kómektesti.
Bas prokýratýranyń Investorlardyń quqyqtaryn qorǵaý komıteti júzege asyryp jatqan Invest Caravan jobasy aıasynda ınvestorǵa qoldaý kórsetildi. Tekeli qalasynda «Steelers» JShS quny 8 mlrd teńgeden asatyn armatýra óndiretin metallýrgııalyq zaýyttyń qurylysyn iske asyryp jatyr. Joba iske asyrylǵannan keıin 160 jumys orny ashylady.
— Jobany súıemeldeý barysynda prokýratýra ınvestordyń tehnologııalyq jabdyqtardy ımporttaý kezinde qosylǵan qun salyǵyn artyq tólegenin anyqtady. Zańnamada kózdelgen esepke jatqyzý tetiginiń bolýyna qaramastan, kásiporyn bıýdjetke 14,6 mln teńgeden astam qarjy aýdarǵan. Investordyń quqyǵyn qorǵaý maqsatynda prokýratýra bul máseleni Jetisý oblysy boıynsha Memlekettik kirister departamentiniń qaraýyna engizdi. Tekserý nátıjesinde ınvestordyń ýájderi rastalyp, artyq tólengen soma kásiporynǵa tolyq kólemde qaıtaryldy, — delingen habarlamada.
Strategııalyq mańyzy bar ónerkásiptik jobany iske asyrý qosymsha ákimshilik kedergilersiz jalǵasyp jatyr.
Jetisý oblysynyń prokýratýrasy ákimshilik kedergilerge tap bolǵan ınvestorlardy +7 (771) 131-04-44 telefony nemese 115 Call-ortalyǵy arqyly habarlasýǵa shaqyrady.
Osyǵan deıin sheteldik ınvestordyń banktik shottary zańsyz buǵattalǵany anyqtaldy.
