Jetisýda evakýatsııalyq pýnktterdi anyqtaıtyn QR-taqtaıshalar ilindi
TALDYQORǴAN. KAZINFORM - Jetisý oblysynda TJD men ákimdikter birlesip, QR-taqtaıshalaryn ilip jatyr. Turǵyndar kodty skanerleý arqyly jaqyn mańdaǵy evakýatsııalyq pýnktterdi anyqtaı alady.

Óńirdegi árbir qala men aýdanda evakýatsııalyq pýnktter belgilengen. Olardyń jalpy sany — 235. Tabıǵı apat, tehnogendik avarııa nemese basqa da tótenshe jaǵdaılar kezinde evakýatsııalanǵan adamdardy ýaqytsha baspanamen, tamaqpen, medıtsınalyq jáne psıhologııalyq kómek túrlerimen sol jer qamtamasyz etedi.

Pýnktter týraly keńinen habardar etý maqsatynda departament ákimdiktermen birlesip QR-taqtaıshalar ornatý jumystaryn júrgizip jatyr. Kodty skanerleý arqyly kartalardan jaqyn mańdaǵy evakýatsııalyq pýnktterdi kórýge bolady. Jalpy oblys boıynsha 1078 QR-taqtaısha ornatyldy.
– Oblys aýmaǵynda 235 halyqty qabyldaý pýnktteri bar. Onyń 31-i Taldyqorǵan qalasynda. Oblys turǵyndary tótenshe jaǵdaılar bolmasa da ózderiniń turǵylyqty jerine jaqyn pýnktterdi ilingen QR-kod arqyly aldyn ala bilip alýy kerek. Qandaı da bir jaǵdaı tirkele qalsa, sol jerge dereý bara alady, - dedi Jetisý oblystyq TJD Azamattyq qorǵanys basqarmasynyń aǵa ofıtseri Azamat Qaqashev.

Eske salaıyq, osyǵan deıin Jetisý oblysynda jylytý maýsymy bastalǵaly 101 órt oqıǵasy tirkelgenin jazǵanbyz.