Jetisýda esirtkiniń iri partııasyn taratpaq bolǵan jas jigit ustaldy
ASTANA. KAZINFORM — Jetisý oblysynda polıtsııa qyzmetkerleri esirtki zattaryn zańsyz saqtap, taratýmen aınalysty degen kúdikpen 19 jastaǵy jas jigitti ustady.
Polıtsııanyń málimetinshe, avtokólikti tintý kezinde skotchpen oralǵan paket anyqtaldy. Onyń ishinen ári qaraı taratýǵa daıyndalǵan untaq tárizdi zat salynǵan 310 orama tárkilendi.
Saraptama qorytyndysyna qaraǵanda, tárkilengen zattardyń arasynan psıhotroptyq jáne esirtki zattary anyqtaldy.
— Atap aıtqanda, 65 gramnan astam mefedron, 79 gramnan astam α-PVP jáne shamamen 17 gramm gashısh bolǵan. Osylaısha, polıtsııa qyzmetkerleri esirtki jáne psıhotroptyq zattardyń iri partııasynyń odan ári taralýyna jol bermedi, — delingen habarlamada.
Kúdikti ustalyp, qamaýǵa alyndy. Atalǵan derek boıynsha sotqa deıingi tergeý bastaldy.
Qazirgi ýaqytta tyıym salynǵan zattardyń qaıdan alynǵany jáne olardy ári qaraı taratý arnalary, sondaı-aq istiń ózge de mán-jaılary anyqtalyp jatyr.
Eske salaıyq, buǵan deıin Jetisý oblysynda esirtkini jarnamalaǵan turǵyn bas bostandyǵynan aıyrylǵanyn habarlaǵan edik.
