Jetisýda jylý jelileriniń 47 paıyzy tozǵan

TALDYQORǴAN.KAZINFORM – Jylý ınfraqurylymyn jańartýǵa jáne otyn qoryn tolyqtyrýǵa barlyǵy 14,2 mlrd teńge bólindi. Bul týraly Jetisý oblysy ákimshiliginiń baspasóz qyzmeti habarlady.

Ákimdiktik málimetinshe, 2025-2026 jyldary jylytý maýsymyna jylýmen jabdyqtaý obektilerin jóndeýge – 6 mlrd teńge, otyn satyp alýǵa – 8,2 mlrd teńge bólindi. Kásiporyndardyń óz qarajaty – 2,2 mlrd teńge.

Qazirgi ýaqytta, kásiporyndar jóndeý jumystarynyń kólemi anyqtalyp, kestege sáıkes jumys istelip jatyr.

Oblys boıynsha barlyǵy 23 qazandyq, 1 jylý elektr ortalaǵy (85 qazan, 2 týrbına), 393 km jylý (tozýy 47%), 3 935 km sýmen jabdyqtaý (tozýy 33%), 628 km káriz (tozýy 56%), 13,7 myń km elektr jelileri (tozýy 82,8%) jáne 2 644 transformatorlyq qosalqy stantsııalary bar.

– Bul jylǵy jóndeý jumystary aıasynda 2 trýbına, 35 qazandyq jóndeledi, 79,5 km sý jelisi qaıta salynady, 12,8 km jylý jelisi jańartylady, 1 100 km elektr jelisi men 412 transformator jóndeýden ótedi, – delingen habarlamada.

Aldaǵy jylytý maýsymyna 293 myń tonna kómir jáne 6,4 myń tonna mazýt daıyndaý josparlanyp otyr. Halyqtyń qajettiligin qamtamasyz etý úshin 37 oryn pen qoıma jumys isteıdi, olarda 17 myń tonna kómir bar. Kómirdiń jalpy qajettiligi 397 myń tonna.

Bıýdjettik uıymdar úshin 10,6 mln lıtr suıyq otyn, 15,1 myń tonna kómir jáne 3,6 myń tonna pellet daıyndalyp jatyr.

Aıta keteıik, jalpy óńirde barlyǵy 610 bilim berý, 352 densaýlyq saqtaý, 352 áleýmettik sala nysandary men 1 697 kóppáterli turǵyn úı bar.

Aldaǵy jylytý maýsymynda Taldyqorǵan qalasy erekshe baqylaýda bolady. Jańa nysandardyń iske qosylýy qosymsha jylý energııasyn qajet etedi.

– Oblys ortalyǵynda jylý júıesin jetildirý maqsatynda eki iri joba iske asyrylyp jatyr. Olar qýaty saǵatyna 49 Gkal bolatyn oramdyq qazandyqtyń (11,1 mlrd teńge) jáne jeke ınvestıtsııalar esebinen gazotýrbınalyq stantsııanyń qurylysy (27 mlrd teńge), – dep atap ótti baspasóz qyzmeti.

Bul jobalar aıaqtalǵannan keıin qala turǵyndary úshin jylýmen qamtamasyz etý sapasy aıtarlyqtaı jaqsarady, al eski «Basqýat» qazandyǵyna júkteme 30%-ǵa azaıady.

Aıta keteıik, 2024-2025 jyldardaǵy jylytý maýsymy shtattyq rejımde ótti. Jylytý maýsymynyń ótý kezeńinde tirshilikti qamtamasyz etý obektilerinde iri avarııalyq jaǵdaılar tirkelgen joq.

Sonymen qatar Premer-mınıstr Oljas Bektenov aldaǵy úsh aıda oblys ákimderi atqarýy tıis birqatar mindetter týraly jazǵanbyz.