Jetisýda eki jylda 13 eldi meken gazdandyrylady – Energetıka mınıstrligi
ASTANA. KAZINFORM – Bul týraly Energetıka vıtse-mınıstri Qaıyrhan Tutqyshbaev Jetisý oblysynyń turǵyndarymen kezdesýi barysynda málim etti, dep habarlaıdy QR Energetıka mınıstrliginiń baspasóz qyzmeti.
Jetisý oblysynda gaz jáne energetıka ınfraqurylymyn damytý boıynsha júıeli jumys júrip jatyr. 2026 jyly 4 gazdandyrý jobasy iske asyrylady. Nátıjesinde 4 aýyldyq eldi mekendegi qosymsha 10 myń adam tabıǵı gazǵa qol jetkizip, gazdandyrý deńgeıi 68,6%-ǵa jetedi.
2027 jyly 134 myń halqy bar 9 eldi mekendi gazben qamtý josparlanyp otyr. Sonyń nátıjesinde gazdandyrý deńgeıi 87,9%-ǵa deıin ósedi. Sonymen qatar «Tekeli energetıkalyq kesheni» JShS-in jańǵyrtý jumystary júrgizilip jatyr. Úkimet Taldyqorǵan qalasyndaǵy jylýmen jabdyqtaý nysandarynyń qurylysyn aıaqtaýǵa qarajat bóldi. Qarjylandyrý qalanyń jańa Ońtústik-Batys turǵyn aýdanynda qazandyq pen jylý jelilerin salý jobalaryn aıaqtaýǵa baǵyttalǵan. Jobalardy iske asyrý Bolashaq, Kóktem, Birlik jáne Qulager shaǵynaýdandaryndaǵy jańa turǵyn úıler men áleýmettik nysandardy turaqty jylýmen qamtamasyz etýge múmkindik beredi.
Qyrkúıek aıynda qýaty 49 Gkal/saǵ bolatyn jańa qazandyqtyń qurylysy aıaqtalady. Sondaı-aq kúzde Ońtústik-Batys turǵyn aýdanynyń jylý jelilerin salý jobasy tolyq aıaqtalady. Bul qazandyqtyń tolyqqandy jumys isteýine qajetti ınfraqurylymdy qamtamasyz etedi. Nátıjesinde jańa shaǵynaýdandardaǵy 20 myń turǵyn senimdi jylýmen qamtylady.
Kezdesý barysynda turǵyndar óńirdi gazdandyrý, suıytylǵan munaı gazymen jáne kómirmen qamtamasyz etý máseleleri boıynsha ózekti suraqtaryn qoıdy. Vıtse-mınıstr Qaıyrhan Tutqyshbaev barlyq saýaldarǵa jan-jaqty jaýap berdi. Barlyq kóterilgen máseleler baqylaýǵa alyndy.
Osyǵan deıin Úkimettiń gaz hımııasy salasyndaǵy halyqaralyq seriktestikti kúsheıtetini týraly jazdyq.
