Jetisýda ehınokokkoz juqtyrǵandardyń 70 paıyzy — balalar

TALDYQORǴAN. KAZINFORM — Jetisý oblysynda 2024 jyly 36 adamnan ehınokokkoz, 45 adamnan brýtsellez aýrýy anyqtaldy. Bul týraly Jetisý oblysy veterınarııa basqarmasy basshysynyń orynbasary málimdedi.

Basqarma ókilderiniń dereginshe, bıyl aýdan jáne qala aýmaqtarynan 15 262 ıt pen 31 mysyq aýlanǵan. Oblys boıynsha 309 qańǵybas úı janýary «izgilik jolymen» joıyldy.

Iesi bar 400-den asa ıt pen mysyq klınıkalyq baqylaýǵa alynyp, olardyń 336-syna qutyryq jáne ehınokokkoz aýrýlarynyń belgileri joq degen anyqtama berilgen.

— 2024 jyly medıtsına mekemelerinde úı janýarlarynyń tistep, tyrnap alýyna qatysty 750 oqıǵa tirkeldi. Ákimshilik quqyq buzýshylyq týraly kodekstiń 407-2-babynyń 1-tarmaǵyna sáıkes, oblys boıynsha 280 adamǵa 6 656 738 teńge kóleminde aıyppul salyndy, — dedi Jetisý oblysy Veterınarııa basqarmasy basshysynyń orynbasary Darhan Ábilbaev.

Jyl basynan beri oblysta mynadaı aýrýlar tirkeldi:

ehınokokkoz — 36 adam;
qyshyma — 8 adam;
dermatomıkoz — 91 adam;
týberkýlez — 24 adam;
dermatofıtııa — 14 adam;
trıhofıtııa — 1 adam;
brýtsellez — 45 adam;
alveokokkoz — 1 adam.

Aıta keteıik, oblysta 1000-nan asa veterınar maman qyzmet atqarady. Óńirde 10 veterınarlyq stantsııa men 118 vetpýnkt jumys isteıdi.