Jetisýda dinı ekstremızmge qatysy bar kúdiktilerden esirtki tárkilendi

TALDYQORǴAN. KAZINFORM — Oblystyq polıtsııa departamentiniń málimetinshe, tergeý barysynda kúdiktilerdiń ekeýi dinı ekstremızm ıdeologııasyn ustanýshylar ekeni anyqtaldy.

Sarqan aýdany aýmaǵynda Polıtsııa departamenti men UQK qyzmetkerleri prokýratýranyń úılestirýimen birlese júrgizgen operatsııasynyń nátıjesinde esirtki zattarynyń zańsyz aınalymyna qatysy bar degen kúdikpen 3 jergilikti turǵyn ustaldy.

Oblystyq polıtsııa departamentiniń málimetinshe, tergeý barysynda kúdiktilerdiń ekeýi dinı ekstremızm ıdeologııasyn ustanýshylar ekeni anyqtaldy. Tintý kezinde olardan iri kólemde «marıhýana» esirtki zaty tárkilendi. Sonymen qatar, Qazaqstan Respýblıkasynyń aýmaǵynda ákelýge, shyǵarýǵa jáne taratýǵa tyıym salynǵan ekstremıstik mazmundaǵy dinı ádebıetter tabylyp, tárkilendi.

— Qazirgi ýaqytta quqyq qorǵaý organdary barlyq mán-jaıdy anyqtaý úshin sotqa deıingi tergeý amaldaryn júrgizýde, — dedi Jetisý oblystyq polıtsııa departamenti.

Polıtsııa esirtki quraldaryn taratý men paıdalaný, sondaı-aq ekstremıstik materıaldardy saqtaý jáne taratý — qatań qylmystyq jaýapkershilikke ákeletin aýyr quqyq buzýshylyqtar ekenin eskertedi.

Eske salaıyq, osyǵan deıin Jetisýda 21 jastaǵy azamattan 111 oram esirtki tárkilengenin jazǵanbyz.