Jetisýda departament basshysy elektr qýaty tarıfin kóterý úshin para alǵan
ASTANA. KAZINFORM — Oblystyq Tabıǵı monopolııalardy retteý departamentiniń basshysy 500 myń teńge para aldy degen kúdikke ilindi.

— Jetisý oblysy boıynsha Sybaılas jemqorlyqqa qarsy qyzmetpen oblystyq Tabıǵı monopolııalardy retteý departamentiniń basshysy áshkerelendi. Sheneýnik 2025 jylǵa arnalǵan elektr energııasynyń tarıfi men tarıftik smetasyn kótergeni úshin «Taldyqorǵan aktsıonerlik kólik-elektrjelilik kompanııasy» AQ basshysynan 500 myń teńge kóleminde para aldy dep kúdiktelýde. Tergeý jalǵasýda. Qylmystyq-protsestik kodekstiń 201-babyna sáıkes ózge aqparat jarııa etilmeıdi, — delingen Antıkor taratqan aqparatta.
Aıta keteıik, Memleket basshysynyń tapsyrmasyn oryndaý úshin Sybaılas jemqorlyqqa qarsy is-qımyl agenttigi qoǵamda zańdylyq pen tártip qaǵıdatyn qamtamasyz etý, sondaı-aq sybaılas jemqorlyq faktileriniń, onyń ishinde joǵary laýazymdy adamdar arasynda jolyn kesý jónindegi jumysty jalǵastyrýda. Qabyldanǵan sharalar men tetikter kesheni qoıylǵan mindetterdi tıimdi iske asyrýǵa jáne zańdylyqtyń buzylýyna ýaqtyly den qoıýǵa múmkindik beredi.
Buǵan deıin Májilis sybaılas jemqorlyqqa qarsy is-qımyl jónindegi qujatty qabyldaǵanyn jazǵan edik.