Jetisýda dándi daqyldardyń ónimdiligin arttyrýǵa baǵyttalǵan tájirıbe usynyldy
ASTANA. KAZINFORM — Jetisý oblysynyń Eskeldi aýdanynda «Birlik» óndiristik kooperatıviniń bazasynda «Dándi daqyldardyń joǵary ónimdi egistikterin qalyptastyrýǵa arnalǵan zamanaýı tehnologııalar» taqyrybynda ǵylymı-tájirıbelik semınar ótti. Bul týraly AShM málim etti.
Іs-shara ozyq agrotehnologııalardy keńinen taratý, tájirıbe almasý jáne ǵylym, memlekettik organdar men aýyl sharýashylyǵy taýaryn óndirýshiler arasyndaǵy ózara yntymaqtastyqty nyǵaıtý maqsatynda uıymdastyryldy.
Semınar jumysyna Qazaqstan Respýblıkasy Aýyl sharýashylyǵy, Ekologııa jáne tabıǵı resýrstar, Sý resýrstary jáne ırrıgatsııa mınıstrlikteriniń, «Atameken» óńirlik kásipkerler palatasynyń ókilderi, ǵalymdar, agrarlyq ǵylym salasynyń mamandary, salalyq uıymdar men aýyl sharýashylyǵy taýaryn óndirýshiler qatysty.
Qatysýshylar elimizdiń azyq-túlik qaýipsizdigin qamtamasyz etý, jer jáne sý resýrstaryn tıimdi paıdalaný, sondaı-aq zamanaýı agrotehnologııalardy engizý ǵylym, memleket jáne bıznes arasyndaǵy tyǵyz ózara is-qımyldy talap etetinin atap ótti.
Semınardyń tájirıbelik bólimi aýyl sharýashylyǵy daqyldaryn ósirýdegi zamanaýı tehnologııalardy tanystyrýǵa arnaldy. Onda dándi daqyldardy ósirýde ǵylymı negizdelgen tásilderdi qoldanýdyń, sýarmaly jerlerdi utymdy paıdalanýdyń jáne sý resýrstaryn tıimdi basqarýdyń nátıjeleri kórsetildi.
— Sýarmaly jerlerde jylyna eki ret ónim alý tehnologııasyna erekshe nazar aýdaryldy. Mamandar aýyl sharýashylyǵy daqyldarynyń erte pisetin sorttaryn paıdalaný jáne agrotehnıkalyq is-sharalardy ońtaılandyrý múmkindikterin tanystyryp, olardyń egistik jerlerin paıdalaný tıimdiligin edáýir arttyrýǵa múmkindik beretinin kórsetti, — delingen vedomstvonyń habarlamasynda.
Ǵylymı ázirlemelerdi tabysty engizýdiń jarqyn úlgisi retinde «Birlik» óndiristik kooperatıviniń tájirıbesi tanystyryldy. Ǵylymı qoldaý jumystarynyń júıeli júrgizilýiniń arqasynda sharýashylyq kúzdik daqyldardyń ónimdiligin jyl saıyn arttyryp keledi. Bıyl bul kórsetkish gektaryna 100 tsentnerden asty.
— Egistik alqaptaryn aralaý barysynda qatysýshylarǵa sý resýrstaryn paıdalaný tıimdiligin arttyrýǵa baǵyttalǵan zamanaýı sýarý ádisteri, onyń ishinde ımpýlstik sýarý tehnologııalary kórsetildi. Sondaı-aq pisý merzimi ártúrli gıbrıdterdi qoldaný arqyly júgeri ósirý tásilderi qarastyryldy. Bul tehnologııa vegetatsııalyq kezeń ishinde sý kózderine túsetin júktemeni neǵurlym utymdy bólýge múmkindik beredi. Mamandardyń baǵalaýynsha, atalǵan tehnologııany qoldaný sý resýrstaryn 40 paıyzǵa deıin únemdeýdi qamtamasyz etedi, — dep habarlady mınıstrlikten.
Semınar qatysýshylary organıkalyq eginshilikti damytý, ósimdik sharýashylyǵyn tsıfrlandyrý, sýarmaly jerlerdiń ónimdiligin arttyrý jáne aýyl sharýashylyǵy óndirisin qazirgi klımattyq ári sý sharýashylyǵy salasyndaǵy syn-qaterlerge beıimdeý máselelerine de erekshe kóńil bóldi.
Іs-shara qorytyndysy boıynsha Qazaq eginshilik jáne ósimdik sharýashylyǵy ǵylymı-zertteý ınstıtýtynyń ǵalymdary usynylǵan tájirıbeni jan-jaqty zerdelep, ony elimizdiń agroónerkásiptik kesheninde engizý jáne keńinen taratý baǵytyndaǵy jumysty jalǵastyrýǵa nıet bildirdi.
Aıta keteıik, Qazaqstannyń astyq pen un eksporty 12 mln tonnadan asty.
