Jetisýda bir kúnde eki bala sýǵa batyp ketti
TALDYQORǴAN.KAZINFORM — 19 maýsymda Jetisý oblysy Qaratal aýdanynyń aýmaǵynda eki birdeı jazataıym oqıǵa tirkelip, saldarynan kámeletke tolmaǵan eki bala qaza tapty. Bul týraly óńirdiń Tótenshe jaǵdaılar departamentiniń baspasóz qyzmeti habarlady.
— Alǵashqy oqıǵa Úshtóbe qalasynyń mańynda Qaratal ózeniniń jaǵasynda bolǵan. 2018 jyly týǵan qyz bala ata-anasymen birge demalyp júrgen kezde sýǵa batyp ketken. Oqıǵa shomylýǵa ruqsat etilmegen, arnaıy belgiler ornatylǵan, biraq jabdyqtalmaǵan ýchaskede bolǵan. Qutqarýshylarǵa habar saǵat 13:30–da kelip túsken. Bala denesin TJD qyzmetkerleri saǵat 14:00 shamasynda sýdan alyp shyqqan, — delingen habarlamada.
TJD resmı málimetinshe, ekinshi oqıǵa dál sol kúni Qojban aýylynda tirkelgen. 2007 jyly týǵan jasóspirim abaısyzda Qaratal ózenine qulap, batyp ketken. Jergilikti turǵyndar jasóspirimniń denesin saǵat 14:30 shamasynda ózderi sýdan alyp shyqqan.
— Jetisý oblysynyń Tótenshe jaǵdaılar departamenti qaza tapqan balalardyń týystary men jaqyndaryna qaıǵyra kóńil aıtady jáne turǵyndardy sý qoımalary mańyndaǵy qaýipsizdik erejelerin qatań saqtaýǵa shaqyrady, — delingen habarlamada.
Eske sala keteıik, Jetisýda shomylý maýsymynyń bastalýyna oraı sý aıdyndarynda azamattardyń qaýipsizdigin qamtamasyz etý maqsatynda profılaktıkalyq sharalar kúsheıtilgenin jazǵanbyz.
