Jetisý oblysynda balasyn urǵan áıeldi sot májbúrli emdeýge jiberdi

TALDYQORǴAN. KAZINFORM — Jarkent qalasynda tórt jasar balaǵa qatygezdik jasady dep aıyptalǵan áıelge qatysty sot otyrysy ótti, dep habarlaıdy Kazinform agenttiginiń tilshisi.

Panfılov aýdandyq sotynyń málimetinshe, oqıǵa 2026 jylǵy 18 qańtarda bolǵan. Sol kúni tórt jasar bala vanna bólmesinde sýdy ashyq qaldyryp, sonyń saldarynan bólmeni sý basqan. Osydan keıin anasy balany jylý batareıasyna baılap, denesiniń ár jerinen birneshe ret urǵan.

Bul áreketterdiń barlyǵy beınejazbaǵa túsirilgen. Balanyń ákesi ulyn birden aýrýhanaǵa jetkizgen. Dárigerler balanyń basy men arqasynda soqqy izderi men teriasty gematomalaryn tirkegen.

Tergeý barysynda bolǵan oqıǵa beınejazba, kýágerlerdiń aıǵaqtary jáne sot-psıhıatrııalyq saraptama qorytyndysy arqyly rastalǵan. Saraptama qorytyndysyna sáıkes, áıel týa bitken aqyl-oı kemistiginen zardap shegedi jáne oqıǵa kezinde óz áreketteriniń qaýiptiligin túsine almaǵan.

Sot áıeldi qylmystyq jaýapkershilikten bosatyp, ony psıhıatrııalyq statsıonarǵa májbúrli emdeýge jiberdi.

Balalar, sonyń ishinde zardap shekken bala da, mamandardyń baqylaýymen arnaıy mekemege ornalastyrylǵan.

Aıta ketý kerek, sot qaýlysy áli zańdy kúshine engen joq.

Eske sala ketsek, buǵan deıin polıtsııa joǵarydaǵy oqıǵa boıynsha, balasyn uryp-soqqan áıeldi ustaǵanyn jazdyq.

Jetisý oblystyq polıtsııa departamenti dereý tekserý bastalǵanyn habarlady.