Jetisýda aýrýhananyń bas dárigerine 4 mln teńgeden asa aıyppul salyndy

ASTANA. KAZINFORM — Jetisý oblysynyń densaýlyq saqtaý mekemelerinde tıisti sertıfıkattarsyz jáne lıtsenzııasyz qyzmetter kórsetilgen, dep habarlaıdy oblystyq prokýratýranyń baspasóz qyzmeti.

Qaratal aýdanynyń prokýratýrasy densaýlyq saqtaý mekemelerine tekserý júrgizdi. Tekserý barysynda medıtsına salasyndaǵy zań talaptarynyń saqtalýy qaraldy. Nátıjesinde tıisti sertıfıkaty men medıtsınalyq qyzmet kórsetýge lıtsenzııasy joq mamandardyń halyqqa qyzmet kórsetkeni anyqtaldy.

— Aýdandyq prokýratýranyń qadaǵalaý aktileri boıynsha, ÁQBtK-niń 424-baptyń 1-bóligi, 426-baptyń 1-bóligi jáne 464-baptyń 1-bóligi boıynsha 20 adam ákimshilik jaýaptylyqqa tartyldy, onyń ishinde 3 basshyǵa — ortalyq aýdandyq aýrýhananyń bas dárigeri jáne onyń orynbasarlaryna 4 049 960 teńge mólsherinde ákimshilik aıyppul salyndy. Sonymen qatar, tekserý aıasynda 4 jaýapty tulǵa (aýyldyq aýrýhana basshylary) medıtsına qyzmetkerleriniń halyqty vaktsınatsııalaý erejelerin buzǵandyqtary úshin ÁQBtK-niń 425-babynyń 1-bóligi boıynsha 157 280 teńge kóleminde aıyppul túrindegi ákimshilik jaýaptylyqqa tartyldy, — delingen vedomstvo habarlamasynda.

Osy tekserýmen 148 adamnyń quqyǵy qorǵaldy, onyń 100-den astamy kámeletke tolmaǵan balalar. Qadaǵalaý aktisi boıynsha bıýdjetke 12,8 mln teńge qaıtaryldy. 

Osydan buryn DSM tekserisinen keıin 250-ge jýyq emdeý kabıneti jabylǵany belgili boldy.