Jetisýda aýyl turǵyndary mádenıet nysanyn zańdastyra almaı júr
TALDYQORǴAN. KAZINFORM - Aqsý aýdanyndaǵy Keńǵaryn aýylynyń turǵyndary óz qarjylaryna mádenıet oshaǵyn turǵyzǵan. Al aýdan ákimi qurylys talapqa saı emes dep zańdastyrmaı otyr.

Aýyl halqy 10 mln teńgege jýyq qarjy jınap, jańa nysannyń irgetasyn qalap, shatyryn jaýyp alǵan. Bitpeı turǵany ishki-syrtqy sylaǵy men usaq-túıek jumystar. Kópshilik baratyn bir mádenı oryn bolsa degen nıetpen salynǵan ǵımaratty ákimdiktegiler zańsyz dep otyr. Al aýyl aqsaqaldary qurylysqa burynǵy ákimniń ruqsat bergenin aıtady.

- 2020 jyly 2 adam bolyp aýdanǵa barǵanbyz. Sol kezdegi ákim «mynalaryńyz jaqsy, aýyldaryńyz uıymshyl eken, bastamalaryńyzǵa qýanyshtymyz» dep shyǵaryp salǵan. Sodan keıin orynbasary Amandos myrza kelip, klýbtaryńyzǵa qurylys retinde qaǵazdaryn jasaımyz, 5 shtat beriledi degen. Ol da jasalǵan joq, - dedi aýyl turǵyny Jaqsyjol Tóleýlın.
Al aýdanynyń qazirgi ákimi Keńǵaryndaǵy mádenı oshaqtyń talapqa saı emestigin alǵa tartty. Eskisin súrip, jańasyn salýǵa kimniń ruqsat bergininen de beıhabar.

- Ol kisiler burynǵy klýbtyń ornyna salypty. Kópshilik baratyn jer. Qurylys salynǵan soń norma saqtalý kerek. Jumys jospary bolý kerek, ol ekspertızadan ótý kerek. Ruqsat berilý kerek. Sodan keıin paıdalanady. Ár adam ózinshe salyp mynany úkimetke al degen qalaı bolady? Erteń ol qulap qalsa kim jaýapkershilikke alady? Rásimdeı almaımyz. Qurylys normasy saqtalý kerek,- dedi Aqsý aýdanynyń ákimi Berik Tynyshbaev.
Turǵyndar shtatta bar biraq aýylda eshqandaı is-shara ótkizbeıtin aýyldyń mádenıet qyzmetkerine de narazy. Aıtýlarynsha, aı saıyn jalaqy alyp otyrǵan qyzmetker muǵalimder uıymdastyrǵan kontsertterge kelip, fotoǵa túsip, joǵarydaǵylarǵa esep beretin kórinedi.

- Bizde shtattaǵy Beıbit degen kisi balalarmen kelip sýretke túsedi eken. Basynda mán bermeıtinbiz ne úshin sýretke túsedi dep. Ol kisi aýdanǵa Qarakózde de, Keńǵarynda da kontsert qoıdym dep fotony otchet retinde jibergen, ınstagramda da bar eken. Eshqandaı da kontsert qoıylǵan joq, uıymdastyrylǵan joq. Ata-analar da kýá, surańyzdar. Qaı balasymen, qaı merekede kontsert uıymdastyrypty ol kisi? 2008-den beri kontsert uıymdastyrylmaǵan. Onyń aldynda da, keıin de uıymdastyrylmady,- dedi Keńǵaryn aýylynyń turǵyny Janar Qasenova.

Aýyl turǵyndarynyń kóńilinen shyqpaǵan jaýapty maman 40 jylǵa jýyq mádenıetke qyzmet etken azamat eken. Ol aýyl turǵyndarymen til tabysa almaǵandyqtan Keńǵaryn aýylyndaǵy jumysyn atqarmaǵanyn moıyndady.

- Basynda teatr uıymdastyrǵanmyn 1-2 kúndeı sonda fotaǵa túskenim bar. Odan basqa joq. Naýryz toıy, Jańa jyl sııaqty aýqymdy halyq jınalatyn kezde 2 aýylǵa birdeı istedim. Bir jyly mektep dırektory jańa mýzykalyq apparatýra alyp keldim. El sizdi kórgisi kelmeıdi endi kelmeńiz dedi. Onda maǵan renjimeńder áıteýir sharalar ótpeı qalmasyn dedim de, sodan beri ol jaqqa barǵan joqpyn. Qarakózde is-sharalarymnyń bárin ótkizip jatyrmyn. Molyqbaı atyndaǵy aýdandyq mádenıet úıindegiler bári biledi, kelip aıtqanmyn. Áleýmettik jelide bári tur bostan-bosqa aqsha tólemeıdi ǵoı,- dedi Qarakóz aýyldyq okrýgynyń mádenıet qyzmetkeri Beıbit Tanysbek.
Aýyl aqsaqaldary jańa nysannyń qujaty zańdastyrylmasa eldiń eńbegi jelge usha ma dep alańdaıdy. Al aýdan ákimi mádenıetke jaýapty mamannyń jumysyn tekseretinin jetkizdi.
Eske salaıyq osyǵan deıin Jetisý óńirinde aýyl turǵyndary qarjy jınap, kópir salǵanyn jazǵanbyz.