Jetisýda áskerge barýdan jaltarǵan jigit izdestirilip jatyr
TALDYQORǴAN. KAZINFORM — Áleýmettik jelilerde ózin zańsyz ustap otyrǵanyn málimdegen Jetisý oblysynyń turǵynyna izdeý jarııalandy. Ol qosymsha medıtsınalyq tekserýden keıin oblystyq jınaqtaý pýnktine qaıtarylyp kele jatqanda ózi qashyp ketken.
Oblystyq shaqyrý komıssııasynyń málimetinshe, azamatqa Qorǵanys isteri jónindegi bólimge kelý qajettigi týraly 1414 servısi arqyly úsh márte habarlama joldanǵan. Atap aıtqanda, SMS-habarlamalar 30 sáýir, 4 mamyr jáne 21 mamyr kúnderi jiberilgen. Alaıda shaqyrylýshy jergilikti áskerı basqarý organyna óz erkimen kelmegen.
Osydan keıin 26 mamyrda polıtsııa qyzmetkerleri ony Kerbulaq aýdandyq qorǵanys isteri jónindegi bólimine jetkizgen. Munda ol aýdandyq medıtsınalyq komıssııadan ótken.
Áleýmettik jelide taraǵan beınejazbada azamat ózin QR Qorǵanys mınıstrliginiń Áskerı-tehnıkalyq mektebine oqýǵa túsý úshin kelgenin aıtqan. Biraq shaqyrý komıssııasynyń málimetinshe, tekserý barysynda onyń atalǵan oqý ornyna qujat tapsyrǵanyn rastaıtyn derekter tabylmaǵan.
— Azamattyń Áskerı-tehnıkalyq mektepke túsý úshin óz erkimen kelip, keıin merzimdi áskerı qyzmetke kúshtep jiberilmek boldy degen málimdemeleri shyndyqqa sáıkes kelmeıdi, — dep habarlady komıssııa.
Sondaı-aq oblystyq medıtsınalyq komıssııadan ótý kezinde shaqyrylýshy azamat densaýlyǵyna qatysty shaǵymdaryn aıtqan. Osyǵan baılanysty oǵan qosymsha medıtsınalyq tekserýler men zerthanalyq taldaýlardan ótýge múmkindik berilgen.
Vedomstvo ókilderiniń aıtýynsha, áleýmettik jelilerde aqparat taraǵan kezde azamatty áskerı bólimge jiberý týraly eshqandaı sheshim qabyldanbaǵan.
— Kerisinshe, onyń ótinishi negizinde densaýlyq jaǵdaıyn jan-jaqty baǵalaý úshin qosymsha tekserýler uıymdastyryldy, — delingen resmı habarlamada.
Alaıda medıtsınalyq tekserýler aıaqtalǵannan keıin oblystyq jınaqtaý pýnktine qaıtarylyp kele jatqan kezde azamat ınspektorlardyń baqylaýynan shyǵyp ketip, belgisiz baǵytqa ketken. Sodan beri jergilikti áskerı basqarý organyna qaıta kelmegen.
Osy fakti boıynsha oǵan izdeý jarııalanyp, materıaldar ishki ister organdaryna joldanǵan. Sonymen qatar ony zańnamaǵa sáıkes jaýapkershilikke tartý máselesi qaralyp jatyr.
Shaqyrý komıssııasy qoldanystaǵy qaǵıdalarǵa sáıkes azamattar shaqyrý naýqany men medıtsınalyq tekserý kezeńinde jınaqtaý pýnktinde bola alatynyn atap ótti. Sondyqtan áleýmettik jelilerde taraǵan «zańsyz ustap otyr» degen aqparat shyndyqqa janaspaıdy dep málimdedi.
Sondaı-aq vedomstvo Ákimshilik quqyqbuzýshylyq týraly kodekstiń 648-babyna sáıkes áskerı qyzmetke shaqyrýǵa baılanysty medıtsınalyq tekserýden jáne ózge de rásimderden jaltarǵany úshin jaýapkershilik qarastyrylǵanyn eske saldy.
Komıssııanyń málimetinshe, medıtsınalyq komıssııalardyń qorytyndylary, beınejazbalar, aqparattyq júıelerdegi derekter men qyzmettik qujattar azamattyń zańsyz ustalǵany nemese ony merzimdi áskerı qyzmetke kúshtep jiberý áreketteri bolmaǵanyn kórsetedi.
Vedomstvo ókilderi turǵyndardy tek resmı ári tekserilgen aqparatqa súıenýge shaqyryp, kórineý jalǵan aqparat taratqany úshin zańnamada jaýapkershilik kózdelgenin eskertti.
Aıta keteıik, Qazaqstanda áskerge shaqyrý júıesi endi tsıfrlyq formatqa kóshedi.
