Jetisýda apatty nemese úsh aýysymdy mektep joq — ákim

ASTANA. KAZINFORM – Jetisý oblysynda sońǵy úsh jylda  1 mln sharshy metr turǵyn úı paıdalanýǵa berildi nemese 13 498 otbasy jańa baspana aldy. Bul týraly óńir ákimi Beıbit Isabaev eseptik kezdesýinde baıandady.

Óńir basshysynyń aıtýynsha, 2 362 baspana halyqtyń áleýmettik osal toptaryna, 388-i apatty turǵyn úıde turatyndarǵa berildi.

– Úsh jylda jańadan salynatyn nemese jóndeýdi qajet etetin áleýmettik nysandar orta eseppen 55,8%-ǵa jańartyldy, bilim berý, densaýlyq saqtaý, mádenıet jáne sport salalaryndaǵy 276 nysan jańartyldy, – dedi B.Isabaev Ortalyq kommýnıkatsııalar qyzmetinde ótken baspasóz máslıhatynda.

Atap aıtqanda, bilim berý salasynda 19 jańa nysan salynyp, 22-si kúrdeli jóndeýden ótti. Nátıjesinde beıimdelgen mektepter sany 69-dan 38-ge deıin qysqardy. Bul rette oblysta apatty jaǵdaıdaǵy jáne úsh aýysymdy mektep joq.

Al densaýlyq saqtaý salasynda 149 jańa nysan qoldanysqa berilip, 13 nysanǵa kúrdeli jóndeý jasaldy. Sondaı-aq oblys qurylǵannan beri 39 sporttyq jáne 34 mádenıet nysandary jańartylyp, paıdalanýǵa berilgen.

– Budan bólek, ınvestorlar esebinen Taldyqorǵan qalasynda jabyq muz arenasy, sportshylarǵa arnalǵan tórt qabatty turǵyn úı jáne eki ústel tennısi ortalyǵy salyndy, – dedi Beıbit Isabaev.

Aıta keteıik, Jetisý oblysynda ortalyq sý júıesimen qamtý 99,9%-ǵa jetti, gazdandyrý deńgeıi jyl sońyna deıin 72% bolady.