Jetisýda alıment tóleýden jaltarǵan 9 adam qylmystyq jaýapqa tartyldy
ASTANA. KAZINFORM — Jetisý oblysynda boryshkerlerden balalar paıdasyna 185 mln teńge óndirildi, dep habarlaıdy oblystyq prokýratýranyń baspasóz qyzmeti.
Jetisý prokýratýrasy balalardyń quqyqtaryn qorǵaý jáne boryshkerlerdi jaýapkershilikke tartý jumystaryn jalǵastyryp jatyr. Óńirde balalaryn asyraýdan qasaqana jaltaryp júrgen ata-analardy jaýapkershilikke tartý boıynsha dáıekti ári nátıjeli sharalar qabyldanyp keledi.
— Oblys prokýratýrasynyń qadaǵalaý qyzmetiniń qorytyndysy boıynsha balalardy asyraýǵa qarajat tólemeý faktileri boıynsha QR QK-niń 139-baby (balalardy kútip-baǵýǵa arnalǵan qarajatty tóleý jónindegi mindetterdi oryndamaý) boıynsha 9 qylmystyq is tirkeldi. Mysal retinde, Tekeli qalasynyń turǵyny sottyń zańdy kúshine engen sheshimin uzaq ýaqyt boıy oryndamaı, kámeletke tolmaǵan qyzyna alıment tóleýden jaltarǵan. Nátıjesinde bereshek somasy 2,1 mln teńgeden asyp, balany qıyn materıaldyq jaǵdaıǵa qaldyrǵan. Boryshkerge birneshe ret resmı jumysqa ornalasý usynylǵanymen, ol eshbir sebepsiz jumys isteýden bas tartyp, ata-analyq mindetterin oryndaýdan jaltarýyn jalǵastyrǵan, — delingen habarlamada.
Buǵan deıin er adam osyǵan uqsas quqyq buzýshylyq úshin ákimshilik jaýaptylyqqa tartylǵan. Atalǵan mán-jaılardy eskere otyryp, sot úkimimen azamat V. QR QK-niń 139-baby boıynsha kináli dep tanylyp, oǵan 1 jyl merzimge bas bostandyǵyn shekteý jazasy taǵaıyndaldy. Sot úkimi zańdy kúshine endi.
Qylmystyq qýdalaý sharalarymen qatar, oblys prokýratýrasynyń bastamasymen 54 boryshker QR ÁQBtK-niń 669-babynyń 1-bóligi (sot úkimin, sot sheshimin nemese ózge de sot aktisin jáne atqarýshylyq qujatty oryndamaý) boıynsha ákimshilik jaýaptylyqqa tartyldy. Sonymen qatar, prokýrorlyq den qoıý sharalary nátıjesinde balalardyń paıdasyna 185 mln teńge óndirildi.
Budan buryn Qaraǵandy oblysynda 252 mln teńgeden astam alıment bereshegi ótelgenin jazǵanbyz.
