Jetisýda alǵashqy qar tústi: «Altyn-Emel» asýynda qozǵalys shekteldi

TALDYQORǴAN. KAZINFORM — Jetisý oblysynda alǵashqy qar jaýyp, daýyldy eskertý jarııalandy. 

Aýa raıynyń nasharlaýyna baılanysty óńirdegi bir jol ýchaskesinde qozǵalysqa shekteý engizildi.

Sınoptıkterdiń málimetinshe, qar oblys aýmaǵynyń basym bóliginde jaýǵan. Taldyqorǵanda túnde 3 mm jaýyn-shashyn túsip, qar qalyńdyǵy shamamen 1 sm boldy. Lepside 8 mm-ge deıin jaýyn-shashyn túsip, qar qalyńdyǵy 9 sm-ge jetti, Tekeli men Qoǵalyda – shamamen 3 sm, Saryózekte – 1 sm.

5 qarasha kúni saǵat 17:00-den bastap «Saryózek – Kóktal» avtojolynyń 40–68 shaqyrymynda (Altyn-Emel asýy) júk kólikteriniń qozǵalysyna shekteý qoıyldy. Joldy ashý shamamen 6 qarasha kúni saǵat 08:00-de josparlanyp otyr.

Daýyldy eskertýge sáıkes, 6 qarashada oblystyń taýly aýdandarynda kóktaıǵaq pen tuman kútiledi, al Alakól kólderi mańynda soltústik-batys jeli 23–28 m/s-qa deıin kúsheıedi.

Sınoptıkterdiń boljamynsha, 7–8 qarashada óńirde negizinen jaýyn-shashynsyz aýa raıy kútiledi, biraq túnde keı jerlerde tuman bolýy múmkin. Túngi aýa temperatýrasy mınýs 10–18 gradýsqa deıin tómendep, kúndiz plıýs 5–12 gradýsqa deıin jylynady.

Aıta keteıik, keshe alǵashqy qar Almaty, Shymkent jáne Túrkistan oblystarynda da tústi.

Sınoptıkterdiń habarlaýynsha, Qazaqstan aýmaǵynyń basym bóliginde aýa raıyn atmosferalyq frontaldy bólinister aıqyndaıdy, olar jańbyr men qar túrindegi jaýyn-shashyn ákeledi.