Jetisýda alǵashqy erikti órt sóndirý beketi ashyldy
TALDYQORǴAN. KAZINFORM — Jetisý oblysynda erikti órt sóndirý beketi iske qosyldy. Bul — azamattyq qorǵaý júıesin damytý men nyǵaıtýǵa baǵyttalǵan vedomstvolyq «Aýyl qutqarýshylary» baǵdarlamasymen jergilikti bıýdjet qarajatyna salynǵan alǵashqy nysan, dep habarlaıdy oblys ákiminiń baspasóz qyzmeti.
Jańa órt sóndirý beketi Qaratal aýdany Almaly aýylynda ornalasqan.
Beket Almaly aýyly men oǵan irgeles eki eldi mekenge qyzmet kórsetedi. Shtatynda 8 qyzmetker bar, ıaǵnı 4 órt sóndirýshi, 4 júrgizýshi qarastyrylǵan. Jeke quram órt pen ózge de tótenshe jaǵdaılarǵa jedel áreket etýdiń arnaıy daıarlyǵynan ótken.
Tótenshe jaǵdaılar departamenti mamandarynyń aıtýynsha, aýyldyq eldi mekenderdiń órttiń aldyn alýdaǵy qajettilikterin qamtamasyz etýge memleket tarapynan barlyq qoldaý kórsetilip otyr.
Munda jumys isteıtin jeke quramnyń turaqty daıyndyǵy men temirdeı tártibi asa mańyzdy. Óıtkeni olardyń jumysy júzdegen otbasynyń ómiri men ál-aýqatyna tikeleı áser etedi. Al atalǵan nysannyń iske qosylýy órt shyqqan jaǵdaıda áreket etý ýaqytyn qysqartyp, adam ómiri men múlikke tónetin qaýiptiń aldyn alýǵa jaǵdaı jasaıdy.
— Buǵan deıin osy aýyldan bólek kórshiles aýylda da tolyqqandy órt sóndirý beketi bolǵan joq. Onyń mindetin eski ǵımarat pen aýyl turǵyndarynan quralǵan tórt erikti atqaratyn. Órt shyǵý qaýpi týyndaǵan jaǵdaıda munda sý toltyrylǵan tsısterna saqtalyp, qajet bolǵan kezde ony oqıǵa ornyna súırep aparatyn. Aýdan ortalyǵynan órt sóndirý tehnıkasy kelgenge deıin órtti shamamyz kelgenshe aýyzdyqtaýǵa tyrysatynbyz. Al qazir kásibı mamandardan quralǵan jańa komanda men zamanaýı tehnıka kez kelgen jaǵdaıǵa jedel ári tıimdi áreket etýge múmkindik beredi, — deıdi Qaratal aýdanynyń tótenshe jaǵdaılar bóliminiń basshysy Qýanysh Raqataev.
Atap ótsek, Almaly aýylynda búginde 800-deı, al Baıshergir aýyldyq okrýgi aýmaǵynda 1300 adam turady. Endi jańa órt sóndirý pýnkti okrýg turǵyndarynyń qaýipsizdigin arttyryp, azamattyq qorǵaý júıesin nyǵaıtýǵa eleýli úles qospaq.