Jetisýda alǵash ret qaterli isikke kúrdeli ota jasaldy
TALDYQORǴAN. KAZINFORM - Taldyqorǵanda sheteldik mamandar qaterli isiktiń 3-shi satysyndaǵy áıelge ota jasap, jańa ádisti engizdi. Mundaı ota respýblıka boıynsha onkologııalyq ortalyqtarda birinshi ret Jetisýda jasaldy.
Jetisý oblysy Densaýlyq saqtaý basqarmasynyń qoldaýymen oblystyq kópsalaly klınıka dárigerleri HIPEC tehnologııasyn qoldana otyryp, analyq bez obyryn, asqazan jáne toq ishek obyryn aralas emdeýdiń jańa, joǵary tehnologııalyq ádistemesin engizdi. Izraıl men Italııadan kelgen mamandar jetisýlyq dárigerlermen tájirıbe almasty.
— Ota 2 kezeńnen turady. 5-6 saǵatqa deıin sozylady. Sebebi, bul - óte kúrdeli otalardyń biri. Qaterli isiktiń 3-4-shi satysyndaǵy naýqastarǵa, metastazasy barlarǵa jasalady, - dedi «Haım Shıba» medıtsınalyq ortalyǵynyń hırýrgııalyq onkologııa bóliminiń aǵa hırýrgy Almog Ben-ıAakov.
Gıpertermııalyq ıntraperıtonealdi hımıoterapııa (HIPEC — aǵylsh. Hyperthermic IntraPeritoneal Chemotherapy) — isik aýrýlaryn emdeýdiń ınnovatsııalyq ádisi. Ol barlyq isik oshaǵyn hırýrgııalyq alyp tastaýdy jáne ish qýysyna 42-43 °C deıin qyzdyrylǵan hımııalyq preparatty engizý arqyly adam dene múshesiniń kez kelgen bóliginde ornalasqan qaterli isikterdi emdeýge múmkindik beredi.
— Elimiz boıynsha onkologııalyq ortalyqtarda birinshi ret bizdiń óńirde jasalyp otyr. Buǵan deıin 2 ret ǵylymı ortalyqtarda jasalǵan. Bul tájirıbeden keıin bizdiń mamandar toqtap qalmaıdy, osy ota túrin ary qaraı jalǵastyrýǵa daıynbyz, - dedi Jetisý oblystyq kópsalaly klınıka dırektory Madııar Ómirbaev.
Aıta keteıik, oblystyq kópsalaly klınıkaǵa 2024 jyly oblys ákimdigi jáne Densaýlyq saqtaý basqarmasynyń qoldaýymen sońǵy úlgidegi HIPEC performer apparaty satyp alynǵan.
Eske salaıyq osyǵan deıin Germanııadan kelgen dáriger taldyqorǵandyqqa tegin ota jasaǵanyn jazǵanbyz.