Jetisýda 85 paıyzǵa tozǵan negizgi qazandyq gazǵa kóshiriledi
TALDYQORǴAN.KAZINFORM – Jetisý oblysy 2025-2026 jylǵy jylytý maýsymyna belsendi daıyndalyp jatyr. Bul týraly Óńirlik kommýnıkatsııalar qyzmetinde ótken baspasóz máslıhatynda oblystyq Energetıka jáne turǵyn úı-kommýnaldyq sharýashylyq basqarmasynyń basshysy Aıdos Beketaev málimdedi.
– Jylytý maýsymyna daıyndyq jumystaryna 14,8 mlrd teńge bólindi. Onyń 6,6 mlrd teńgesi – jylý nysandaryn jóndeýge, 8,2 mlrd teńgesi – otyn satyp alýǵa baǵyttaldy. Qazirgi ýaqytta ınfraqurylymnyń daıyndyǵy 84 paıyzdy qurap otyr, – dedi basqarma basshysy.
Taldyqorǵan qalasyndaǵy negizgi jylý kózi – «Basqýat» qazandyǵy. Qazir bul nysannyń tozý deńgeıi 85 paıyzǵa jetken. Osyǵan baılanysty ony gazǵa kóshirý jáne jańǵyrtý jobasy ázirlenip jatyr.
– Sonymen qatar qosymsha qazandyqtar men gaztýrbınalyq stantsııa qurylysy júrip jatyr. Bul bolashaqta «Basqýat» qazandyǵyna túsetin júktemeni azaıtady, – dedi Aıdos Beketaev.
Sondaı-aq Tekeli qalasynda JEO-ny keńeıtý jumystary bastalǵan. Bul joba qalanyń jylý kózderin ártaraptandyrýǵa jáne apattyq jaǵdaılardyń aldyn alýǵa baǵyttalǵan.
Buǵan deıin, Aqtóbe qalasynda keıbir kópqabatty úıler jylytý maýsymyna daıyn emes ekenin habarlaǵanbyz.