Jetisýda 8 mektepte eńbek zańnamasy buzylǵan
ASTANA. KAZINFORM — Jetisýda 798 muǵalimniń eńbek quqyǵyna qatysty zań buzýshylyq anyqtaldy, dep habarlaıdy Tekeli qalalyq prokýratýrasynyń baspasóz qyzmeti.
Tekeli qalasynyń prokýratýrasy bilim berý uıymdarynda eńbek zańnamasynyń saqtalýyna taldaý júrgizdi. Nátıjesinde 798 qyzmetkerdiń eńbek quqyqtaryna qatysty zań buzýshylyqtar anyqtaldy.
— Atap aıtqanda, qalanyń 8 mektebiniń ujymdyq sharttary Eńbek kodeksiniń talaptaryna tolyq sáıkes kelmegen. Olarda qyzmetkerdi jyl saıynǵy aqy tólenetin eńbek demalysynan keri shaqyryp alǵan jaǵdaıda, paıdalanylmaǵan demalys bóliginiń ótemaqysyn tóleý týraly erejeler kózdelmegen. Prokýrorlyq qadaǵalaý aktisi boıynsha zań buzýshylyqtar joıyldy. Ujymdyq sharttar zańnama talaptaryna sáıkestendirilip, tıisti kepildikter engizildi. Kináli laýazymdy tulǵalar tártiptik jaýapkershilikke tartyldy, — delingen vedomstvo taratqan aqparatta.
Budan buryn el mektepterinde 5000-nan astam muǵalim jetispeıtinin jazǵanbyz.
