Jetisýda 67 adam jolda qaldy: Adamdar jol jabyq dese de elemeı saparǵa shyǵyp ketedi

TALDYQORǴAN. KAZINFORM — Jetisý oblysynda polıtseıler men qutqarýshylar qar qursaýynan 67 adamdy shyǵardy. 

Jetisý polıtseıleri men qutqarýshylary «Saryózek-Kóktal» avtojolynda 67 adamdy evakýatsııalady, onyń arasynda eki bala men bir júkti áıel bar.

— Aıaz, kóktaıǵaq jáne boranmen birge júretin óńir aýmaǵyndaǵy aýa raıynyń kúrt ózgerýi avtokólik ıelerine kóp qıyndyq týǵyzdy. Mundaı jaǵdaıda polıtseıler qutqarýshylarmen jáne jol qyzmetimen birlesip avtokóliktiń qaýipti jolǵa shyǵýyna jol bermeý jóninde shara qabyldap jatyr. Alaıda, qozǵalys shekteýlerin elemeı, qolaısyz aýa raıyna qaramaı jolǵa shyǵyp, ózine jáne óz jolaýshylarynyń ómirine qaýip tóndiretinder de bar, — dep atap ótti PD PPB vzvodynyń komandıri Dýman Seńgirbaev.

Júrgizýshiler polıtseılerge, qutqarýshylarǵa jáne jol qyzmetkerlerine shynaıy rızashylyqtaryn bildirdi.

Ótken táýlikte aýa raıyna baılanysty respýblıkalyq jáne oblystyq mańyzy bar kóptegen joldar jabyldy. 

Polıtsııa qyzmetkerleri óz kezeginde patrýldi kúsheıtip, táýlik boıy jumys isteıdi.