Jetisýda 1000 dombyrashy merekelik sherýge qatysyp, bir mezette kúı oryndady
TALDYQORǴAN. KAZINFORM — Jetisý oblysynda Ulttyq dombyra kúni keń kólemde atalyp ótti. Óńirdiń túkpir-túkpirinde ulttyq ónerdi ulyqtap, turǵyndarǵa erekshe rýhanı áser syılaǵan merekelik is-sharalar uıymdastyryldy. Osylaısha óńirde 1000 dombyrashy merekelik sherýge qatysyp, bir mezette belgili kúılerdi oryndady.
Panfılov aýdanynda 500 dombyrashynyń qatysýymen sherý uıymdastyrylyp, ulttyq kúı ónerin ulyqtaýǵa baǵyttalǵan jarqyn kontserttik baǵdarlama usynyldy.
Eskeldi aýdanynda 300 dombyrashy «Dombyra – Uly dalanyń úni» atty is-shara aıasynda merekelik sherýge qatysyp, bir mezette kúı oryndady.
Al Sarqan aýdanynda Ulttyq dombyra kúnine arnalǵan aýqymdy is-shara Sarqan qalasynda ótti. Qala kóshelerinde kúıler men dástúrli ánder oryndalyp, 255 dombyrashy qatysqan sherý ortalyq bazar alańynda jalǵasyp, turǵyndar men qala qonaqtaryna arnalǵan kontserttik baǵdarlamaǵa ulasty.
Eske salsaq, buǵan deıin Taldyqorǵan qalasynda Ulttyq dombyra kúnine oraı Muqan Tólebaev atyndaǵy orkestrdiń mýzykanttary tikeleı efırde álemniń 10 eli men respýblıkalarynan dombyrashylarymen birge Nurǵısa Tilendıevtiń «Álqısa» kúıin bir mezette oryndaǵan bolatyn. Sharaǵa tikeleı efır arqyly Qytaı, AQSh, Túrkııa, Belgııa, Túrikmenstan, Qyrǵyzstan, Ózbekstan, Tájikstan, Bashqurtstan jáne Altaı ólkesinen dombyrashylar qatysyp, osylaısha qazaqtyń kúı óneriniń sheberleri men janashyrlaryn bir arnaǵa toǵystyrdy.
