Jetisýda 35 eldimekende 35 jańa tý tuǵyrynan eldiń kók baıraǵy bir mezgilde kóterildi

Negizgi shara retindegi Táýelsizdiktiń 35 jyldyǵyna oraı «35 aýyl — 35 Tý tuǵyry» patrıottyq aktsııasy aıasynda aýdan-qalalardaǵy 35 eldimekende bir mezette telekópir baılanysy arqyly 35 jańa tý tuǵyry ashylyp, Tý kóterildi. Bul tý tuǵyrlary jergilikti metsenattar men kásipkerlerdiń qoldaýymen ornatyldy. 

Oblys kóleminde keńinen atap ótilgen patrıottyq is-sharalarǵa jalpy sany 3,5 myńǵa jýyq adam qatysty, onyń myńnan astamy oblys ortalyǵynda jınaldy.

Taldyqorǵan qalasyndaǵy «Jastar» saıabaǵy alańynda bıiktigi 92 metrlik tý tuǵyrynda ornatylǵan Memlekettik Týdy kóterý saltanaty ótti.

Merekelik sharaǵa Jetisý oblysynyń ákimi Beıbit Isabaev, máslıhat depýtattary, ardagerler, memlekettik qyzmetshiler, zııaly qaýym ókilderi, quqyq qorǵaý organdarynyń qyzmetkerleri, áskerı qyzmetshiler, sportshylar, jastar, qala turǵyndary qatysty.

Memlekettik Tý kóterilgen sátte Taldyqorǵan áskerı garnızonynyń úrmeli orkestriniń súıemeldeýimen kameralyq hor men oblystyq fılarmonııa ártisteri Qazaqstan Respýblıkasynyń Ánuranyn oryndady. Sonymen qatar jergilikti shyǵarmashylyq ujymdardyń oryndaýynda patrıottyq ánder shyrqaldy.

Jalpy, Taldyqorǵandaǵy Tý tuǵyrynyń bıiktigi kezdeısoq tańdalmaǵan. Onyń 92 metr bolýy — táýelsiz Qazaqstannyń memlekettik rámizderi bekitilgen 1992 jyldyń sımvoldyq belgisi. Memlekettik Týdyń uzyndyǵy — 25 metr, eni — 12 metr. Kompozıtsııanyń tuǵyr bóliginde Qazaqstan kartasy beınelengen. Tý tuǵyry Memlekettik Týdy avtomatty túrde kóterýge arnalǵan arnaıy mehanızmmen jabdyqtalǵan bolat konstrýktsııadan turady. Onyń janynda saltanatty is-sharalardy ótkizýge arnalǵan amfıteatr ornalasqan.

Patrıottyq aktsııaǵa qatysqan óńirdiń aýdan-qalalarynyń turǵyndary bul bastamanyń mańyzdylyǵyn atap ótip, pikirlerin bildirdi.

— Memlekettik rámizder — bizge ata-babamyzdan jetken mura ári bizdiń basty qundylyǵymyz. Memlekettik Týlardyń bir mezette kóterilgenin kórý óte áserli boldy, — dedi Taldyqorǵan qalasyndaǵy № 18 mektep-lıtseıiniń oqýshysy Aqqoja Nuráli.

— Men «Jasyl el» jastar ekologııalyq qozǵalysynyń múshesimin. Búgin Memlekettik Rámizder kúnine arnalǵan sharaǵa qatysýǵa keldim. Bul merekeniń biz úshin mańyzy zor. Óıtkeni rámizder — bizdi tarıhymyzdy qadirleýge, Otanǵa degen súıispenshilikti eseleýge úıretetin elimizdiń sımvoly, — dedi Taldyqorǵandaǵy № 12 mektep-gımnazııanyń oqýshysy, volonter Aıaýlym Ashatqyzy.

— Búgin — bizdiń aýdanymyz úshin erekshe kún. Memlekettik rámizder kúninde aýylymyzǵa Tý tuǵyry ornatyldy. Bul Tý tuǵyry aýylǵa kire beris jerdegi mádenıet úıi men sport kesheni ornalasqan ortalyqqa qoıyldy. Týdyń kúnde jelbirep turǵanyn kórý bolashaq chempıondarǵa, ónrpazdarǵa, jalpy aýyl halqyna úlken shabyt berip, maqsattaryna jetýge talpyndyrady dep oılaımyn, — dedi Qaratal aýdany Eskeldi bı aýylynyń turǵyny Murat Berikboluly.

— Búgin bizdiń aýylda jańa Tý tuǵyrynan Memlekettik Tý kóterildi. Rámizderdi nasıhattaýdyń urpaqty tárbıeleýdegi róli úlken. Sondyqtan aýylymyzda osyndaı mańyzdy oryn ashylǵanynan qýanyshtymyz, — dedi pedagog, Alakól aýdany Jylandy aýylynyń turǵyny Elmıra Rapılova.

— Jolaman aýylynda jańa Memlekettik Tý jańa bıik tuǵyrǵa kóterilgenine kýá boldyq. Kók baıraǵymyz — Táýelsizdigimizdiń sımvoly, el birligi men bolashaqqa degen senimniń belgisi. Memlekettik rámizderge kórsetilgen qurmet ár azamattyń boıynda Otanǵa degen súıispenshilik pen maqtanysh sezimin arttyrady. Tý tuǵyryn ornatý jas urpaqqa patrıottyq tárbıe berýdiń de mańyzdy úlgisi dep bilemin. Ony ornatý jobasyna atsalysqan azamattardyń bárine rızashylyǵymyzdy bildiremiz, — dedi Kerbulaq aýdany Jolaman aýylynyń turǵyny Dıdar Dıhanbaev.

— Búgin el kóleminde ótip jatqan Rámizder kúnin biz, Aqsý aýdanynyń turǵyndary laıyqty atap ótip otyrmyz. Osy aýdannyń 5 birdeı eldimekeninde — Eginsý, Mataı, Qyzylaǵash, Arasan, Kóshkental aýyldarynda jańa Tý tuǵyry ashylyp, olardan Tý bıikke kóterildi. Saltanatty sharaǵa ásirese jastarymyzdyń, oqýshylardyń belsendi qatysqanyna qýandyq. Bul olardyń el bolashaǵyna degen jaýapkershilikti sanaly túrde sezinetinin bildiredi, — dedi Qyzylaǵash aýylynyń turǵyny Áshimǵalı Jumageldi.

— «Jeńis» saıabaǵy — Eskeldi aýdanyndaǵy eń kórikti oryndardyń biri. Búgin osy jerde Memlekettik Týymyzdyń bıik tuǵyrǵa kóterilgenin kórip, erekshe tolqydyq. Aýyl bolyp jınalyp bárimiz tamashaladyq. Kók baıraǵymyz saıabaqqa erekshe sán berip tur. Osyndaı sátter elge degen maqtanyshymyzdy arttyra túsedi. Týymyz árdaıym asqaqtap, elimiz aman bolsyn, — dedi Qarabulaq aýylynyń turǵyny Sáýle Amantaeva.