Jetisýda 3 kúnniń ishinde 20 mal ıesi jaýapkershilikke tartyldy
TALDYQORǴAN. KAZINFORM — Jetisý polıtseıleri profılaktıkalyq is-shara aıasynda 3 kúnniń ishinde aýyl sharýashylyǵy janýarlaryn jaıý erejesin buzǵan 20 mal ıesin jaýapkershilikke tartty.
Polıtsııa qyzmetkerleri 3 kún ishinde mal jaıý men tasymaldaý erejelerin buzýdyń 40-tan astam faktisin anyqtady. Oblystyq patrýldik polıtsııa batalonynyń qyzmetkerleri osy kúnderi mal jaıý erejeleriniń buzýshylyqtaryn anyqtaý boıynsha aýqymdy jumys júrgizdi. Sebebi qaraýsyz, bos júrgen janýarlar jol apatyna jıi sebepker bolady.
– Nebári 3 kúnniń ishinde 20 mal ıesi ákimshilik jaýapkershilikke tartyldy, onyń 12-si Panfılov aýdany boıynsha, – dep málimet berdi Jetisý oblysy PD PPB komandıriniń m.a. Abylaı Berkendikov.
Sonymen qatar úı janýarlaryna jaryq shaǵylystyratyn elementterdi taǵý, sondaı-aq tas joldar mańynda mal jaıýǵa jol bermeý jóninde turǵyndarǵa keńinen túsindirý jumystary júrgizildi.
