Jetisýda 27 jańa óndiris ashylyp, myń jarym jumys orny quryldy
ASTANA. KAZINFORM — Jetisý oblysynda bıylǵy 10 aıda barlyq sala boıynsha ósim baıqalady. Bul týraly oblys ákimi Beıbit Isabaev eseptik kezdesýinde aıtty.
Ákimniń sózinshe, jyl sońyna deıin Jetisý oblysynyń jalpy óńirlik ónimi 2,7 trln teńgeni quramaq.
— Jyl basynan beri oblys ekonomıkasyna 17% ósimmen 397 mlrd teńge ınvestıtsııa tartyldy. Óńirimizde 2023-2025 jyldary 108 myń jumys orny quryldy, onyń ishinde 70 myńnan astam adam turaqty jumysqa ornalastyryldy. Nátıjesinde, jumyssyzdyq deńgeıi — 4,7%-ǵa tómendedi, ataýly áleýmettik kómek alýshylar sany eki ese azaıdy, — dedi B. Isabaev Ortalyq kommýnıkatsııalar qyzmetinde ótken baspasóz máslıhatynda.
Óńirde ortasha aılyq jalaqy 18%-ǵa ósip, 331 myń teńgeni qurasa, jan basyna shaqqandaǵy ortasha tabys 19%-ǵa ulǵaıyp, 172 myń teńgege jetken.
Sonymen birge, bıyl Jetisýdaǵy ónerkásip ónimin shyǵarý 5%-ǵa artady. 2023-2025 jyldary 27 jańa óndiris iske qosyldy, 7 jumys istep turǵan kásiporyn keńeıtildi, myń jarym jańa jumys orny quryldy.
Іri zaýyttar qatarynda ónerkásiptik statsıonarlyq akkýmýlıatorlar shyǵaratyn «ASMA Industrial» jańa zaýyty, Alakól jáne Sarqan aýdandarynda, Tekeli jáne Taldyqorǵan qalalarynda salynǵan qýaty 50 MVt eki jel elektr stantsııasy bar.
— Aldaǵy eki jylda ónerkásip salasynda qosymsha 30 jobany iske asyrý josparlanyp otyr. Mysaly, Kerbulaq aýdanynda «Shoǵyrlandyrylǵan taý-ken qurylys kompanııasy» úlken jobasynyń qurylysy bastaldy. Taldyqorǵanda tegistegish bolat shar óndiretin «ME-ELECMETAL» zaýytynyń qurylysy júrip jatyr. Keler jyly Qatty turmystyq qaldyqtardy kádege jaratý jáne qaıta óńdeý zaýytyn salý josparlanǵan. Bul jeke ınvestormen birlesken joba, — dedi oblys ákimi.
Budan buryn Jetisý oblysynda 9 myń gektardan astam jer orman qoryna berilgeni anyqtaldy.