Jetisýda 14 jasar qyzyn aıýandyqpen óltirgen erli-zaıyptyǵa úkim shyqty
TALDYQORǴAN. KAZINFORM — Taldyqorǵanda kámeletke tolmaǵan qyzdy azaptap, qasaqana óltirgen erli-zaıyptylardyń isi boıynsha sot otyrysy aıaqtaldy. 14 jasar Karına Dorohınanyń ólimine týǵan anasy men ógeı ákesi kináli dep tanyldy.
Jetisý oblysynyń qylmystyq ister jónindegi mamandandyrylǵan aýdanaralyq soty erli-zaıypty M. jáne E-ge qatysty QK 121-baby 3-2-bóligi 3-tarmaǵy, 110-baby 2-bóligi 1-tarmaǵy, 99-baby 2-bóligi 7, 10, 14-shi tarmaqtarymen aıyptalǵan qylmystyq isti qarady.
Sot taratqan málimetke súıensek aıyptalýshy M. 2023 jyldyń kúzinde kámeletke tolmaǵan jábirlenýshige qarsy kúsh qoldanyp, ógeı ákesi bola tura seksýaldyq sıpattaǵy ózge de áreketter jasaǵan.
Tergeý málimetinshe, M. jáne E. aldyn ala sóz baılasyp, qylmysty jasyrý maqsatynda qyzdy qasaqana óltirgen.
— Sot úkimimen M. 121-babynyń 3-2 bóligi 3-tarmaǵy, 110-babynyń 2-bóliginiń 1-tarmaǵy, 99-babynyń 2-bóliginiń 7,10,14-tarmaqtary boıynsha kináli dep tanylyp, oǵan ómir boıyna bas bostandyǵynan aıyrý jazasy taǵaıyndaldy. Sot úkimimen E. 110-babynyń 2-bóliginiń 1-tarmaǵy, 99-babynyń 2-bóliginiń 7,10,14-tarmaqatrymenkináli dep tanylyp, oǵan 19 jylǵa bas bostandyǵynan aıyrý jazasy taǵaıyndaldy. Sondaı- aq, odan jábirlenýshi ókiliniń paıdasyna 15 mln. teńge moraldyq zııan óndirildi. Úkim zańdy kúshine engen joq, — dedi Jetisý oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
Eske sala keteıik, atalǵan jantúrshigerlik qylmys 2023 jyldyń sońynda bolǵan edi.
Taldyqorǵanda 14 jasar qyz eki aı boıy sabaqqa barmaı, joǵalyp ketti.
Keıinnen jasóspirimniń joǵalýyna kúdikti retinde anasy men ógeı ákesi ustalyp, qamaýǵa alyndy.
Tergelip jatqan Karınanyń ata-anasy qylmys jasaǵandaryn moıyndap, qyzdyń denesin kómgen oryndy kórsetti.
Osylaısha oblys polıtseıleri qyzdyń jerlengen jerin taýyp, denesin qazyp aldy.