Jetisýda 13 jastaǵy qyzdy ıt talap tastaı jazdady

ASTANA. KAZINFORM — Áleýmettik jelilerde taraǵan aqparatqa sáıkes, oqıǵa Eskeldi aýdanynyń Baqtybaı aýylynda bolǵan. Jarııalanǵan fotosýrette ıttiń qyzdy qaýyp alyp, aıaǵyn tyrnaǵany kórinedi, dep habarlaıdy Kazinform agenttiginiń tilshisi.

Eskeldi aýdanynyń ortalyq aýrýhanasy jasóspirim medıtsınalyq mekemege ýaqytyly jetkizilgenin atap ótti.

— Balany travmatolog dáriger qarady. Qajetti alǵashqy medıtsınalyq kómek tolyq kólemde kórsetildi. Qoldanystaǵy klınıkalyq hattamalarǵa sáıkes qutyrmaǵa qarsy vaktsınatsııa jasaldy. Tıisti em taǵaıyndalyp, ári qaraı baqylaý boıynsha usynystar berildi. Patsıenttiń jaǵdaıy qanaǵattanarlyq. Kómek kórsetilgennen keıin bala turǵylyqty jerinde ambýlatorııalyq em alý úshin jiberildi, — delingen habarlamada.

Jetisý oblysynyń polıtsııa departamenti janýardyń ıesi anyqtalǵanyn habarlady.

— Polıtsııa qyzmetkerleri ıttiń ıesin anyqtap, úı janýarlaryn ustaý jáne serýendetý erejelerin buzǵan Eltaı aýylynyń turǵynyn ákimshilik jaýapkershilikke tartty, — delingen vedomstvo taratqan aqparatta.

Quqyq qorǵaýshylar úı janýarlaryn ustaý erejelerin saqtaý — formaldyq emes, aınaladaǵy adamdardyń qaýipsizdigi úshin mańyzdy ekenin eske saldy.

Sonymen qatar, aýdan ákimdigi aımaqta qańǵybas janýarlardy ustaýǵa jaýapty uıym anyqtalǵanyn jáne ol jaqyn arada jumysqa kirisetinin habarlady.

Buǵan deıin Almaty oblysynda bir adamnyń on shaqty ıti 52 jastaǵy áıeldi talaǵanyn jazǵanbyz.