Jetisýda 1147 fermerdiń quqyǵy qorǵaldy: prokýratýra 68 mln teńgeni qaıtardy
ASTANA.KAZINFORM - Jetisý oblysynyń prokýratýrasy aýyl sharýashylyǵy taýaryn óndirýshilerdiń quqyqtaryn qorǵaýdy qamtamasyz etti. Qadaǵalaý qyzmetiniń nátıjesinde sýarý sýyn berý qyzmetteri úshin tólem esepteý barysynda jiberilgen zań buzýshylyqtar joıylyp, myńnan astam sharýa qojalyǵynyń quqyqtary qalpyna keltirildi.
Jetisý oblysynyń mamandandyrylǵan tabıǵat qorǵaý prokýratýrasy «Qazsýshar» RMK óńirlik fılıaly tarapynan agrarshylardan sýarý sýy úshin 100 paıyz kóleminde tólem talap etilgenin anyqtady.
Qoldanystaǵy zańnamaǵa sáıkes memleket sýarmaly eginshilikke paıdalanylatyn sý shyǵyndarynyń bir bóligin sýbsıdııalaý arqyly aýyl sharýashylyǵy taýaryn óndirýshilerdi qoldaý tetigin qarastyrǵan. Alaıda 2025 jylǵa arnalǵan 68 mln teńge kólemindegi sýbsıdııalardyń ýaqtyly tólenbeýine baılanysty atalǵan soma óńirlik fılıal tarapynan fermerlerdiń bereshegi retinde negizsiz esepke alynyp, tolyq kólemde óndirilgen.
Nátıjesinde oblystaǵy 1 147 sharýa qojalyǵyna qosymsha qarjy júktelip, olardyń zańmen kepildik berilgen memlekettik qoldaý sharalaryn alý quqyqtary shektelgen.
Prokýrorlyq qadaǵalaý sharalarynyń nátıjesinde anyqtalǵan zań buzýshylyqtar joıyldy. 1 147 sharýashylyqtyń quqyqtary qalpyna keltirilip, aýyl sharýashylyǵy taýaryn óndirýshilerge buryn negizsiz óndirilgen 68 mln teńge qaıtaryldy. Qarajattyń bir bóligi fermerlerdiń ótinishteri negizinde 2026 jylǵy sýarý maýsymyna arnalǵan tólem retinde esepke jatqyzyldy.
-Jetisý oblysynyń prokýratýrasy agroónerkásiptik keshendi memlekettik qoldaý salasyndaǵy zańdylyqtyń saqtalýyn qamtamasyz etý, kásipkerlerdiń quqyqtaryn qorǵaý jáne aýyl sharýashylyǵy taýaryn óndirýshilerdiń múddelerine nuqsan keltiretin zań buzýshylyqtardyń aldyn alý baǵytyndaǵy jumystardy jalǵastyrady,-delingen habarlamada.
Shymkentte prokýratýra aralasqannan keıin ınvestorǵa jer ýchaskesi berildi.
