Jetisýda 100-den astam adam «bank qyzmetkerlerine» aldanǵan

TALDYQORǴAN. KAZINFORM — Jyl basynan beri ınternet-alaıaqtar jetisýlyqtardy 516 mln teńgeden astam shyǵynǵa ushyratqan. 119 azamat ózin bank qyzmetkerimin dep tanystyrǵandarǵa aldansa, taǵy 100-den astam adam ınternet habarlandyrýlarǵa senip taýar, qyzmeti úshin aldyn ala tólem jasap qomaqty qarajattan aıyrylǵan. 

Jetisý oblystyq polıtsııa departamentiniń málimetinshe, bıyl 10 aıda alaıaqtyq isimen 341 fakti tirkelgen.

Ákki alaıaqtardyń qylmysyn áshkereleý da ońaıǵa túspeı tur. Polıtseıler bıyl tirkelgen 341 qylmystyń 18%-yn ǵana ashqan.

Degenmen, departament mamandary alaıaqtyq qylmysyna qatysty kúresti kúsheıtkenin aıtady. Qazaqstannyń iri qalalarymen qatar, kórshi elderden de birneshe kúdikti ustalǵan. 

— Olar Telegram arnasynda krıptovalıýtaǵa arnalǵan shottardy satýǵa arnalǵan jarnamany taýyp Tokaev obnal, Starline, Joker obnal, «Djordj Olıver» telegram kanaldarymen jumys istegen. Joǵaryda atalǵan tulǵalardyń árbiri telefonyna (atyna 7 banktik ótinimdi júktep alǵan) túsken somanyń 20%-yn, ıaǵnı esepshottar arqyly kúnine ortasha eseppen 4 mln teńge alyp otyrǵan, — dedi Jetisý oblysy PD KPB aǵa jedel ýákili, polıtsııa kapıtany Ernat Serikhanuly.

Quzyrly organ ókilderi kıberqylmys, onyń ishinde telefon jáne ınternet-alaıaqtarynyń qýlyǵyna quryq boılamaı turǵanyn eskertedi. Halyqty saq bolýǵa shaqyrady.

Eske salaıyq, buǵan deıin aýyzbastyryq úshin páter talap etken jetisýlyq azamattyń sottalǵanyn jazǵanbyz.