Jetisýda 10 jastaǵy bala kúnde tańerteń ózenge túsip, shynyǵyp júr
TALDYQORǴAN. KAZINFORM- Taldyqorǵandyq Mustafa kún saıyn tańǵy ýaqytta ózen sýyna shomylady. Ata-anasy sýyq sýǵa túskeli beri uldarynyń densaýlyǵy jaqsarǵanyn aıtsa, dárigerler muny maquldaǵan joq.
Mustafa Dosjanuly – Taldyqorǵan qalalyq Quljabaı Qasymov atyndaǵy №28 ІT mektep-lıtseıiniń 5-synyp oqýshysy. Jyl basynan beri qala irgesindegi Sarybulaq saıajaıyna baryp, ózen sýyna shomylady. Qys aıynda muzdaı sýǵa túsip, shynyǵýǵa apasy úıretken. Uldyń ata- anasy da balalarynyń bul isin quptap otyr. Aıtýlarynsha, sýyq sýǵa túskeli beri Mustafanyń densaýlyǵy jaqsarǵan.
- Bıyl jyl basynan bastap túsip júr sýǵa. Sýyq sýmen shynyǵýyna apasy sebepker boldy. Ol kisi aýyryp, sodan sýyq sýmen emdelýdi qolǵa alǵan. Mustafaǵa da úıretti. Sýǵa túsýdiń óziniń ádisteri bar. Ekeýi birge kúnde ertemen ózenge baryp, sýǵa túsedi. Balamnyń allergııasy bolǵan. Ózenge shomylǵaly beri sap tyıyldy, - dedi ákesi Dosjan Qydyrhanov.
Dárigerler qys aılarynda muzdaı sýǵa shomylý arqyly aǵzany shynyqtyryp, ımmýnıtetti kúsheıtýge bolatynyn, ol bulshyq et pen býyn aýrýyn azaıtyp, tumaýdy boldyrmaýyna septigin tıgizetinin aıtty. Biraq adamnyń jas ereksheligi eskerilýi kerek eken.
- 7-10 jasqa deıingi balalarǵa qys aılarynda sýyq sýǵa shomylýǵa bolmaıdy. Bul – balalardyń ımmýndyq júıesi jáne termoregýlıatsııa ortalyǵynyń qalyptasý ereksheligimen túsindiriledi. Sýyq sýmen kontakt osy júıelerdiń buzylýyna alyp kelýi múmkin. Balalar úshin de, úlkender úshin de qys aılarynda sýyq sýǵa shomylý birtindep júıeli túrde bolǵan durys. Birden sýyq sýǵa shomylý aǵzaǵa zııan bolady, sol úshin aldymen aǵzany birtindep úıretý kerek. Sebebi sýyq sýǵa shomylý shynyqpaǵan adam úshin qaýipti. Tynysy toqtap, esinen tanyp, aıaq-qoly tartylýy múmkin, - dedi terapevt dáriger Saıat Qanatuly.
Sýyq sý qabyldap, sergek júretin Mustafanyń densaýlyǵymen qatar sabaq úlgerimi de jaqsy. Osy oraıda daıyndyqsyz jáne eresekterdiń qaraýynsyz ózen, kólderge baryp sýǵa shomylý bala ómirine qaýipti ekenin de eskertemiz.
Eske salaıyq osyǵan deıin 7 jasar Amır Aıdarhanovtyń álem chempıonatynyń altyn júldesin ıelengenin jazǵanbyz.