Jetisý joldaryndaǵy kólik apatynan 123 adam kóz jumdy

Bıyl el aýmaǵyndaǵy joldarda bolǵan kólik apaty 9 paıyzǵa kóbeıgen. Bul jaǵdaı Jetisý oblysynda da máz emes. Jyl basynan beri 428 jol-kólik oqıǵasy tirkelip, apat saldarynan 123 adam qaza tapqan. Mert bolǵandardyń arasynda 20 bala bar, dep habarlaıdy Kazinform.

Jetisý oblysy Polıtsııa departamenti Jergilikti polıtsııa qyzmetiniń basshysy, polıtsııa polkovnıgi Qaısar Muhmetovtiń aıtýynsha, 13-19 qarasha aralyǵynda óńirde «Jol qaýipsizdigi aptalyǵy» ótýde.

«Aptalyq aıasynda túrli is-sharalar josparlanǵan. Mysaly «Qamqor ana», «Jolaýshy – bala», «Stýdenttik ıdeıalar men bastamalar – joldardaǵy qaýipsiz qozǵalys úshin», «Úzdik avtomektep», «Biz ómirge senemiz!» sııaqty ataýly baǵyttar jolda júrý erejesi men qaýipsizdikti qamtamasyz etýdi nasıhattaıdy. Sondaı-aq Dúnıejúzilik kólik oqıǵalary qurbandaryn eske alý kúninde jol polıtsııasy qyzmetkerleri men turǵyndar arasynan shyqqan eriktiler qan tapsyrý aktsııasyn ótkizedi. Bul shara qoǵam nazaryn jol qaýipsizdigin saqtaýǵa aýdaryp, túrli apattardyń aldyn alýǵa septigin tıgizbek. Basty maqsatymyz kólik oqıǵasynan zardap shekkenderge kómek kórsetý jáne jol qozǵalysyna qatysýshylardy yntymaqtastyqqa, júrgizý mádenıetin arttyrýǵa shaqyrý» - deıdi Qaısar Muhmetov.

Búginde Jetisý óńirinde patrýldik polıtsııa toptary táýlik boıy jumys isteýde. Olar 14 kameraly Ekin patrol qurylǵysymen jabdyqtalǵan.