«Jetisý» voleıbol klýby onynshy ret Qazaqstan chempıony atandy
ASTANA. KAZINFORM — Astana qalasynda «Barys arena» stadıonynda voleıboldan áıelderdiń ulttyq lıga komandalary arasynda Qazaqstan chempıonatynyń ekinshi fınaldyq kezdesýi aıaqtaldy.
Keshe Qazaqstannyń toǵyz dúrkin chempıony «Jetisý» (Taldyqorǵan) komandasy «Qýanyshty» (bas bapkeri ıÝrıı Panchenko) 3:2 esebimen tize búktirgen edi.
Bul joly alǵashqy eki partııada serbııalyq maman Marko Grshıchtiń shákirtteri basymdylyq tanytty — 25:13, 25:21.
Úshinshi setti Oral voleıbolynyń túlegi, «Qýanysh» jáne Qazaqstan ulttyq quramasynyń kapıtany Sana Anarqulova bastaǵan soltústikqazaqstandyqtar óz paıdasyna jazdy — 25:21.
Tórtinshi sette «Jetisýdyń» kapıtany, reseılik Marııa Frolova jeńis núktesin qoıdy — 25:21. Qorytyndy esep — 3:1.
Osylaısha, «Jetisý» klýby óz tarıhynda onynshy ret Qazaqstan chempıonatynda úzdik shyqty.
Qola júlde úshin básekede búgin «Berel» (Óskemen) komandasy Túrkistannyń «Turanyn» 3:1 (20:25, 25:16, 25:23, 25:17) jeńip, esepti teńestirdi. Qazaqstan birinshiliginiń qola júldegeri erteń qosymsha úshinshi matchta anyqtalady.
Al 5-8 oryndar úshin oıyndarda aqtóbelikter «Qaraǵandydan» 3:0 (25:17, 25:14, 25:18) esebimen basym tússe, almatylyqtar «Astanadan» aılasyn asyrdy — 3:0 (25:11, 25:22, 25:18).
Eske sala keteıik, budan buryn voleıboldan Qazaqstan chempıonatynda alǵashqy fınaldyq kezdesýde «Jetisýdyń» jeńiske jetkenin jazǵan bolatynbyz.
