Jetisý ýnıversıtetinde ıtalııalyq JOO fılıaly ashyldy

ASTANA. KAZINFORM – Jansúgirov atyndaǵy Jetisý ýnıversıtetinde Italııanyń Ankona qalasyndaǵy Marke polıtehnıkalyq ýnıversıtetiniń fılıaly ashyldy. Bul týraly Jetisý oblysynyń ákimi Beıbit Isabaev aıtyp berdi.

Sheteldik JOO fılıaly bıylǵy jyldyń shilde aıynda ashylǵan.

– Osylaısha Jetisý memlekettik ýnıversıtetiniń dıplomy Italııada da, Qazaqstanda da moıyndalatyn bolady. Qazir professor-oqytýshylar quramynda Italııadan kelgen 8-10 adam stýdentterge sabaq berip júr, – dedi B. Isabaev Ortalyq kommýnıkatsııalar qyzmetinde tilshilerge bergen suhbatynda.

Qosdıplomdy bilim berý baǵdarlamasy aıasynda stýdentter "Agronomııa", "Aýyl sharýashylyǵy ǵylymdary men tehnologııalary" baǵyty boıynsha oqıdy.

– Jetisý – agrarlyq óńir ekenin eskersek, bizge ınnovatsııalar men ozyq agrotehnologııalardy engizetin joǵary bilikti mamandar qajet. Birlesken joba óńirdiń kadrlyq áleýetin nyǵaıtýǵa úles qosaryna úmittenemin, – dedi oblys ákimi.

Buǵan deıin B. Isabaev Jetisýda apatty nemese úsh aýysymdy mektep joq ekenin aıtqan edi.