Jetisý turǵyny bal satatyn óskemendikti aldap, 100 myń dollar shyǵynǵa batyrdy

  ÓSKEMEN. KAZINFORM – Óskemen qalalyq №2 sotynda asa iri kólemdegi alaıaqtyq baby boıynsha qylmystyq is qaraldy.

Bal satýmen aınalysatyn óskemendik óz ónimin qaıta óńdeýge arnalǵan jabdyq satyp almaq bolady. Sóıtip, qajetti tehnıkanyń Qytaıda bar ekenin tanysynan estıdi. Ol bolsa jabdyqtyń aldyn ala tólemin Jetisý oblysynda turatyn basqa bir tanysy arqyly jiberý qajettigin aıtady.

Jetisý turǵyny Óskemenge kelip, kásipkerden 100 myń dollardan astam qarajatty alǵan. Ózine sendirý úshin qytaılyq deldalmen beıneqońyraý arqyly baılanys ornatqan. Alaıda arada birshama ýaqyt ótkende jabdyqty jetkizgenniń ornyna, habar-osharsyz ketedi.

- Sot barysynda anyqtaǵandaı, ol qarjyny jeke qajettilikterine jumsap tastaǵan. Onyń qaıda júrgeni uzaq ýaqyt belgisiz boldy. Sotta aıyptalýshy óz kinásin moıyndaýdan bas tartty. Dese de tergeý kezinde is boıynsha qolhattar, aýdıo jáne beınematerıaldar, kýágerlerdiń aıǵaqtary jınalǵan, - dep habarlady sottyń baspasóz qyzmetinen.

Sot úkimimen sottalýshy asa iri kólemdegi alaıaqtyq jasaǵany úshin kináli dep tanylyp, 5 jarym jylǵa bas bostandyǵynan aıyryldy. Sonymen qatar ol jábirlenýshige keltirilgen materıaldyq zalaldy óteýge mindetteldi.

Eske salsaq, osyǵan deıin asa iri alaıaqtyq jasaǵan qazaqstandyq azamat Grýzııada ustalǵany jaıly jazǵanbyz.