«Jetisý» syrt alańda jeńiske jetti, «Atyraý» men «Oqjetpes» teń tarqasty

ASTANA. KAZINFORM – Fýtboldan Qazaqstan Premer-lıgasynyń 14-týry aıasynda eki kezdesý ótti. 

Aldymen jezqazǵandyq «Ulytaý» komandasy óz alańynda taldyqorǵandyq «Jetisý» komandasymen kezdesti. Alań ıeleri sapynan Sergeı Keıler kezdesýdiń 21 mınýtynda kózge túsip, óz komandasyn esepte alǵa shyǵardy. Ekinshi taımda Samat Smaqovtyń fýtbolshylary tarazy basyn teńestirip qana qoımaı, jeńisti goldy da soqty. 49 jáne 62 mınýtta taldyqorǵandyq klýbtyń shabýylshysy Rýslan Bolov qarsylas komanda qaqpasyn dál kózdedi. Osylaısha reseılik oıynshy dýbl avtory atandy.  

Al osy jeńisinen keıin týrnırlik kestede «Jetisý» komandasy 13 upaımen 10-orynǵa kóterildi. 

«Atyraý» men «Oqjetpes» arasyndaǵy oıyn tartysqa toly bolǵanymen, esep ashylǵan joq. Qos komanda 0:0 esebine qanaǵat bildirip, teń tarqasty. Komanda tizginin qaıta qolǵa alǵan Vıtalıı Jýkovskıı osy maýsymdaǵy alǵashqy kezdesýinde komandasyna 1 upaı syılady. 

Kókshetaýlyq komanda 21 upaımen 6-orynǵa jaıǵassa, «munaıshylar» 5 upaımen týrnırlik kesteniń sońynda tur. 

Eske sala keteıik, buǵan deıin Fýtboldan Qazaqstan Birinshi lıgasynda «Kaspıı» onynshy márte jeńiske jetkenin jazǵan edik.