Jetisý polıtsııasy 20 jastaǵy stýdenttiń qazasyn erekshe baqylaýǵa aldy
ASTANA.KAZINFORM — Áleýmettik jelide Taldyqorǵan qalasyndaǵy 20 jastaǵy stýdenttiń qaza bolǵany týraly aqparat keń tarady. Jarııalanǵan habarlamalarǵa sáıkes, jas jigit dostarymen fýtbol matchyn kórip otyrǵanda týyndaǵan janjal kezinde kóz jumǵan.
Qaıǵyly oqıǵa 7 mamyr kúni bolǵan. Stýdent Jáńgir Nurlanuly sol keshte dosynyń páterine fýtbol kórýge barǵan.
Áleýmettik jelilerde jarııalanǵan aqparatqa sáıkes, úıde shamamen onshaqty adam bolǵan, onyń ishinde 17 jastaǵy oqýshy da bar. Kezdesý kezinde jastar arasynda daý týyndaǵan. Olar syrtqa shyǵyp ketip, keıin qaıta oralǵan.
Keıin oqýshy Jáńgirdi qaıta shaqyryp alyp, ony birneshe jerden ret pyshaqtaǵan. Ol alǵan jaraqattarynan qaza bolǵan.
Jáńgirdiń anasy qaıǵyly oqıǵanyń aldynda ǵana ulymen vıdeoqońyraý arqyly sóıleskenin aıtady. Aıtýynsha, ulynyń kóńil-kúıi jaqsy bolǵan, ázildep, sońyra qaıta habarlasýǵa ýáde bergen.
Jetisý oblystyq polıtsııa departamenti qylmystyq tergeýdi rastady.
— Kúdikti ustalyp, ýaqytsha ustaý ızolıatoryna qamaldy. Mamandandyrylǵan tergeý soty aldyn ala qamaýǵa alýdy sanktsııalady. Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan keshendi jáne obektıvti tergeý júrgizilip jatyr. Qazaqstan Respýblıkasynyń zańnamasynda kózdelgen birqatar qajetti tergeý jáne protsessýaldyq is-shara júrgiziledi, - dep habarlady polıtsııa.
Departament tergeý Jetisý oblystyq polıtsııa departamenti basshylyǵynyń erekshe baqylaýynda ekenin atap ótti.
QR Qylmystyq is júrgizý kodeksiniń 201-babyna sáıkes, tergeý múddesi úshin basqa aqparat jarııalanbaıdy.
Buǵan deıin Almaty oblysynda 24 jastaǵy jigit pyshaq jaraqatynan kóz jumyp, úsh kúdikti ustalǵany habarlanǵan.
