Taldyqorǵandaǵy jylý jelilerin jóndeýge Úkimet rezervinen 5,7 mlrd teńge bólindi

Memleket basshysy Qasym-Jomart Toqaevtyń halyqty senimdi jylýmen qamtamasyz etý jónindegi tapsyrmalaryn júzege asyrý sheńberinde Qazaqstan Respýblıkasynyń Úkimeti Jetisý oblysynyń ortalyǵy Taldyqorǵan qalasynda jylýmen qamtý nysandaryn salý jobalaryna shamamen 5,7 mlrd teńge bóldi.

Atalǵan qarajat qaladaǵy Ońtústik-Batys jańa turǵyn aýdanynda qazandyq pen jylý jelilerin tartý jobalaryn aıaqtaýǵa baǵyttalady.

Búginde Taldyqorǵan qalasynyń ortalyqtandyrylǵan jylýmen jabdyqtaý júıesinde jalpy qýaty 400 Gkal/saǵ bolatyn 10 qazandyq jumys isteıdi. Jylý jelileriniń jalpy uzyndyǵy 179 shaqyrymdy quraıdy, ortasha tozý deńgeıi — 62%. «Basqýat» ortalyq qazandyǵy 1980 jyly paıdalanýǵa berilgen, onyń negizgi jabdyqtary 71% tozǵan.

Oblys ortalyǵyndaǵy halyq sany jyl saıyn artyp kele jatqandyqtan, «Basqýat» qazandyǵy qosymsha jylý júktemesin tolyq qamtamasyz ete almaı otyr. Osyǵan baılanysty júktemeni azaıtý jáne kezeń-kezeńimen ekologııalyq taza energııa kózderine kóshý maqsatynda qalada qýaty 49 Gkal/saǵ bolatyn qazandyqtyń qurylysy júrgizilip jatyr.

— Joba quny kelisimshart boıynsha 11,1 mlrd teńgeni quraıdy. Qazir qurylys jumystarynyń shamamen 60%-y oryndaldy. Nysandy paıdalanýǵa berý 2026 jylǵy qazan aıyna josparlanǵan, — delingen habarlamada.

Jańa qazandyqtyń tolyqqandy jumys isteýin qamtamasyz etý úshin Ońtústik-Batys turǵyn aýdanyna jylý jelilerin tartý jobasy qatar júrgizilip jatyr. Atalǵan jobany aıaqtaý da osy jyldyń kúzine josparlanǵan. Jobalardy ýaqtyly júzege asyrý nátıjesinde «Bolashaq», «Kóktem», «Birlik» jáne «Qulager» shaǵyn aýdandarynda 2024–2026 jyldary salynǵan kópqabatty turǵyn úıler men áleýmettik nysandar sapaly ári úzdiksiz jylýmen qamtamasyz etiledi. Jalpy abonentter sany 20 myńdy quraıdy, onyń ishinde 120 kópqabatty turǵyn úı jáne 17 áleýmettik, kommertsııalyq jáne ózge de nysandar bar.

Buǵan deıin habarlanǵandaı, Úkimet ótken jylytý maýsymyn qorytyndylaıdy.