Jetisý óńirinde respýblıkalyq joldar jabyldy

TALDYQORǴAN. KAZINFORM — Búgin aýa raıynyń qolaısyzdyǵyna baılanysty «Almaty- Óskemen» avtojolyna ýaqytsha shekteý qoıyldy. Úsharal — Dostyq joly da júk kólikteri men qoǵamdyq kólikter úshin jabyldy.

— 14 qarashada saǵat 02:00-den bastap Jetisý oblysynda aýa raıynyń qolaısyzdyǵyna baılanysty «Almaty-Óskemen» avtojolynyń 9-180 shaqyrym aralyǵynda (Úsharal qalasynan Dostyq aýylyna deıin) júk kólikteri men qoǵamdyq kólikterge (avtobýs) shekteý qoıyldy, — dep habarlama taratty «QazAvtojol» Ulttyq kompanııasy.

Kompanııa ókilderi sondaı-aq «Almaty-Óskemen» avtojolynyń 45-68 shaqyrym aralyǵynda Saryózek aýylynan Kóktal aýylyna deıin, Altyn Emel asýy kóliktiń barlyq túrleri úshin jabylǵanyn eskertti.

Aýa raıynyń kúrt buzylýy saldarynan joldaǵy qıyndyqtarǵa baılanysty Jetisý oblystyq polıtsııasy jolaýshylarǵa saparda muqııat bolýdy eskertedi.

Eske salaıyq buǵan deıin Taldyqorǵan-Úsharal baǵytynda kólik qozǵalysyna shekteý qoıylǵanyn jáne Jetisý oblysynda jol kólik oqıǵasynan 3 adamnyń mert bolǵanyn jazǵanbyz.