Jetisý oblysynyń joldaryn Ekin patrol baqylaıdy

Jetisý oblysynda ereje buzǵandardy avtomatty túrde anyqtap, aıyppul salatyn arnaıy qondyrǵysy bar avtokólikter jolǵa shyqty, dep habarlaıdy Kazinform.

«Ekin patrol» dep atalatyn jańa qurylǵy - tóńirekti 360 gradýsqa deıin sholyp, ózinen 70 metrge deıingi qashyqtaǵy avtokóliktiń nómirin jazyp alýǵa qabiletti 14 kamerasy bar «aqyldy» júıe. Búginnen bastap osy qondyrǵymen jabdyqtalǵan 3 avtokólik Jetisý oblysynyń joldaryndaǵy jumysyn bastady.

- Búginnen bastap Ekin patrol ornatylǵan 1 patrýl kóligi qala ishinde, ekeýi oblys aýmaǵynda jol tártibin baqylap júr. Endi avtokólik ıeleriniń jolda abaılap qozǵalýyna týra keledi. Jańa patrýl jol boıynda durys qoıylmaǵan kólikti de, joldaǵy retteý jolaǵynan asyp ketken nemese baǵdarshamnyń qyzyl shamyna ótip ketken avtokólikterdi de túsirip alady, - deıdi Jetisý oblysy Polıtsııa departamenti taratqan aqparatta.

Jalpy endi jol erejesin buzatyndar azaıýy múmkin. Óıtkeni kólik júrgizýshileriniń kóbi jol boıynda, bir orynda ilinip turǵan kameralardyń mańynda ǵana ereje saqtaıtyny jasyryn emes.

Al jyljymaly kamera ereje buzý sátin kez kelgen jerden baqylaı alady eken. Demek, endi kólik tizginin ustaǵandar jolda abaı bolyp, ereje saqtap júretin boldy.