Jetisý oblysynyń turǵyny óz ulyn óltirdi degen kúdikke ilindi
Jetisý oblysy Kerbulaq aýdanynyń 63 jastaǵy turǵynyn polıtseıler óz ulyn óltirdi degen kúdikpen ustady, dep habarlaıdy QazAqparat tilshisi.
Oblystyq polıtsııa departamentiniń málimetinshe, atalǵan fakt Kerbulaq aýdanynda tirkeldi, 28 qyrkúıek kúni sharýa qojalyǵynyń aýmaǵynda zorlyq-zombylyqtyń aıqyn belgileri bar jas jigittiń máıiti tabyldy. Tártip saqshylary ony óltirdi degen kúdikpen 63 jastaǵy er adamdy ustady.
«Ustalǵan azamat jábirlenýshiniń týǵan ákesi bolyp keledi. Aldyn ala málimet boıynsha, dastarhan ústinde alkogoldik ishimdik ishýdiń aıaǵy janjalǵa ulasyp, sońy qaıǵyly oqıǵamen aıaqtalǵan», - dep habarlady vedomstvodan.
Kúdikti ýaqytsha ustaý ızolıatoryna qamaldy. Qajetti saraptamalar taǵaıyndalyp, Qazaqstan Respýblıkasy QK-niń 99-baby (adam óltirý) boıynsha tergeý amaldary júrgizilýde.
